ئەردۆغان: بۆ پرۆسەی چەکدانانی پەکەکە لەگەڵ هەولێر و بەغدا لە گفتوگۆداین

ئاڤا نیوز

ڕەجەب تەیب ئەردۆغان، سەرۆککۆماری تورکیا جارێکی دیکە جەخت لەوە دەکاتەوە کە" پێویستە پەکەکە بە تەواوی لە چەک دابماڵدرێت و بە بێ کەموکوڕی بڕیاری هەڵوەشانەوەی جێبەجێ بکات"

چیرۆکی سەرەکی: دوای بەشداریکردنی لە لووتکەی وڵاتانی ئەوروپی کە بە ئامادەبوونی 47 دەوڵەت و ڕێکخراوی ئەوروپی لە تیرانای پایتەختی ئەلبانیا بەڕێوەچوو، ڕەجەب تەیب ئەردۆغان، سەرۆککۆماری تورکیا لەکاتی گەڕانەوەی بۆ وڵاتەکەی وەڵامی ڕۆژنامەنووسانی لەبارەی چەکدانانی پەکەکە دایەوە.

لێدوانی فەرمی: ڕەجەب تەیب ئەردۆغان، سەرۆککۆماری تورکیا لە وەڵامی ڕۆژنامەنووسان گوتی:"چۆنییەتی هەڵوەشانەوەی ڕێکخراوەکە و ڕادەستکردنی چەکەکانیان لەلایەن دامودەزگاکانی ئەمنی دەوڵەتەکەمان چاودێری دەکرێت". هەروەها لەگەڵ دراوسێکانیشمان لە دەرەوەی سنوورەکانمان گفتوگۆمان کردووە. لەبارەی چۆنییەتی بەشداری بەغدا و هەولێر لە قۆناغەکەدا پلانمان هەیە. کاتێک چەکەکان ڕادەست کران و ڕێکخراوەکە بە تەواوی هەڵوەشایەوە، دایکان و باوکان ئاسوودە دەبن. 

زانیاریی زیاتر: بەگوتەی ئەردۆغان، توندوتیژی بە تەواوی نامێنێ و سیاسەتی مەدەنی دەگیرێتە بەر. بەو شێوەیە تورکیا باشتر دەتوانێت بگات بە ئامانجەکانی. ئەم هەنگاوە هەروەها دەتوانێت یارەمەتیدەری سەقامگیری و ئارامی عێراق و سووریاش بێت".

لەلایەکی دیکەوە: لەبارەی دانوستانەکانی نێوان ئۆکراینا و ڕووسیا، ئەردۆغان گوتی: "هەموو هەوڵێک دەدەین بۆ بەکرانەوە هێشتنەوەی کەناڵەکانی پەیوەندی و بەردەوامیدان بە دیالۆگی نێوانیان".

باکگراوند: لە 2025-05-12، پەکەکە لەسەر بانگەوازی عەبدوڵڵا ئۆجەلان، هەڵوەشاندنەوەی خۆی و چەکدانانی ڕاگەیاند، بەمەش تورکیا دوای 42 ساڵ دەرگای بەڕووی سەردەمێکی نوێدا کردەوە. لە ئێستادا چاوەڕوان دەکرێت پرۆسەی چەک داماڵێنی پەکەکە بچێتە بواری جێبەجێکردنەوە.