مەحسوون قرمزیگول: لە تورکیا کێشەی گەورەتر لە تیرۆرمان هەیە ئەویش گەندەڵییە

ئاڤا نیوز

مەحسوون قرمزیگول، هونەرمەندی بەناوبانگی تورکیا کە بە ڕەچەڵەک کوردە، ڕەخنە لە بوونی گەندەڵی لە تورکیا دەگرێت و دەڵێت: لە تورکیا کێشەی گەورەتر لە تیرۆر هەیە، ئەویش گەندەڵییە، ئەگەر ئاشتەواییش بەدی بێت، تا گەندەڵی و نادادی هەبێت، هیج کات ئەم وڵاتە ئاسوودەیی بەخۆیەوە نابینێت.

وێنە گەورەکە: بڕیاری هەڵوەشاندنەوەی پەکەکە، کاردانەوەی جیاوازی لە نێوان چین و توێژەکانی نێو تورکیا لێکەوتەوە. هونەرمەندانیش بەشێک بوون لە دەربڕینی کاردانەوەکان.

چی ڕوویدا: لیستێک بەناوی هونەرمەندان بڵاوکراوەتەوە گوایە ئەو هونەرمەندانە دەڵێن "تورکیایەکی بێ تیرۆریان ناوێت"، لە لیستەکە ناوی قرمزیگولی تێدا بووە، ناوبراو ڕەتی دەکاتەوە داوای شتێکی لەو شێوەیەی کردبێت و دەڵێت، ئەو ڕۆژانەی من گۆرانیم بۆ ئاشتی و برایەتی دەوت، من دەمگوت دایکان جەرگ سووتاو نەبن، ئێوە نەتاندەزانی لە کوێش وەستاون.

بڵاوکراوەی فەرمی: مەحسوون قرمزیگول لە ئێکس نووسیویەتی: لەم وڵاتە کێشەی لە تیرۆر گەورەترمان هەیە ئەویش "گەندەڵییە"، لە بنەڕەتدا ئەوەی داهاتی ئەم وڵاتە دەبات "سیاسەتمەدار و بەرپرسە گەندەڵەکانن". ئەگەر ئاشتەواییش بەدی بێت، ئەوا تا کێشەی گەندەڵی و لە تورکیا هەبێت، خەڵکی هیچ کات ئاسوودە و دڵخۆش نابن.

ئەوەی پێویستە بیزانیت: ئەم قسانەی قرمزیگول لە کاتێکدایە کە ماوەیەک لەمەوبەر زیاترە لە 100 ئەندامی جەهەپە لەگەڵ ئەکرەم ئیمامئۆغلو، سەرۆکی گەورە شارەوانی ئیستەنبووڵ بە تۆمەتی"گەندەڵیکردن" دەستگیرکران.

باکگراوند: مەحسوون قرمزیگول، هونەرمەندێکی دیار و گەورەی تورکیایە، بە ڕەچەڵەک کوردە و خاوەنی جەماوەرێکی گەورەیە لەو وڵاتە.