ئاڤا بەدواداچوون لەسەر زیادکردنی دەوامی فەرمانبەرانی شارەوانییەکان دەکات

ئاڤا نیوز

زیادکردنی کاتی دەوامی فەرمانبەرانی شارەوانییەکان بووەتە جێی قسە و باس، بەڕێوەبەری گشتیی شارەوانییەکانی هەولێر دەڵێت، 'بەگوێرەی ڕێنمایی دارایی دەوامی فەرمانبەرەکان زیاد کراوە'.

وێنە گەورەکە: دەنگۆی دەرچوونی بڕیارێک بۆ زیادکردنی کاتی دەوامی فەرمانبەران لەلایەن بەڕێوەبەرایەتی گشتیی شارەوانییەکانی هەولێرەوە بڵاوبووەوە، گوایە بەگوێرەی بڕیارەکە ڕۆژانە چەند فەرمانبەرێک زیاد لە دەوامی ئاسایی خۆیان، دەبێت بۆ چەند کاتژمێرێک دەوام بکەن و مامەڵەی هاووڵاتیان ڕایی بکەن، لەبارەی هەژمارکردنی دەوامە زیادەکە داوا لە ئاڤا کراوە بەدواداچوون بکات.

لێدوانی فەرمی: مەریوان هادی، بەڕێوەبەری گشتیی شارەوانییەکانی هەولێر، بە ئاڤا میدیای ڕاگەیاند: ڕێنمایی دارایی بۆ سەرجەم شارەوانییەکان هاتووە، ڕەزامەندیمان هەیە کە فەرمانبەرانی بەشی موڵکایەتی کە کاری کارت و تاپۆ دەکەن تاوەکو کاتژمێر 05:00ی ئێوارە بۆ ڕاییکردنی کاری هاووڵاتیان بمێننەوە.

- هەر فەرمانبەرێک بەگوێرەی کاتە زیادەکەی پارەی ڕۆژانەی بۆ هەژمار دەکرێت، ئەگەر تەواوی مانگەکە زیاد دەوامی کردبێت، ئەوا 160 هەزار دیناری پێ دەدرێت.

زانیاریی تایبەت: بە وتەی بەڕێوەبەری گشتیی شارەوانییەکان، 14 فەرمانبەر ڕۆژانە دوو کاتژمێر و نیو تا سێ کاتژمێر لەکاتی خۆیان زیاتر دەوام دەکەن، مانەوەشیان ناچاری نییە و بە ویستی خۆیانە.

ئەوەی پێویستە بیزانیت: زیادکردنی کاتژمێرەکانی دەوامی فەرمانبەرانی بەشی موڵکایەتی بۆ ئەوەیە کە کارەکانی هاونیشتمانیان زووتر ڕایی بکرێت.