ترەمپ: لەبارەی ڕاگرتنی جەنگ لەگەڵ ئۆکراینا قسە لەگەڵ پووتین دەکەم

ئاڤا نیوز

دۆناڵد ترەمپ، سەرۆکی ئەمریکا هیوادارە کە ئۆکراینا و ڕووسیا بگەنە ئاگربەست و دەڵێت: بەر لەوەی لەگەڵ زێلێنسکی قسە بکەم، ڕۆژی دووشەممە پەیوەندی بە پووتینەوە دەکەم و دەمەوێت هەڵوێستی ڕووسیا لەبارەی ڕاگرتنی جەنگ لەگەڵ ئۆکراینا بزانم.

چییرۆکی سەرەکی: هەینی ڕابردوو 16-5-2025، شاندی دانووستانکاری نێوان ئۆکراینا و ڕووسیا بە نێوەدندگیریی تورکیا و ئەمریکا لە ئیستەنبووڵ کۆبوونەوە، بڕیاریاندا کە بەردەوامی بە دانووستانەکان بدەن.

لێدوانی فەرمی: ترەمپ لە تروس سۆشیال ڕایگەیاند: پێش ئەوەی گفتوگۆ لەگەڵ ڤۆڵۆدیمیر زیلێنسکی، سەرۆکی ئۆکراینا و  ژمارەیەک سەرکردەی ئەندامی ناتۆ بکەم، ڕۆژی دووشەممە لەسەر پرسی وەستانی جەنگ لەنێوان ئۆکراینا و ڕووسیا بە تەلەفۆن گفتوگۆ لەگەڵ پووتین دەکەم.

- هیوادارم ئۆکراینا و ڕووسیا بگەنە ڕێککەوتن و کۆتایی بەو شەڕە بێت کە هەر لەسەرەتاوە نەدەبوو دەستپێبکات.

باکگراوند: سەرەڕای کۆبوونەوە بەردەوامەکانی ئەمریکا لەگەڵ ڕووسیا و ئۆکراینا و دەوڵەتانی یەکێتی ئەوروپا بۆ کۆتاییهێنان بە جەنگی سێ ساڵەی نێوان هەردوو دەوڵەت، جەنگی نێوان ڕووسیا و ئۆکراینا تاوەکو ئێستا بەردەوامی هەیە.