لە لووتکەی عەرەبی نهێنییەکی 50 ساڵ لەمەوبەری عێراق ئاشکرا دەبێت

ئاڤا نیوز

 

لە لووتکەی عەرەبیدا سەرۆکی سۆماڵ داوای لە حکومەتی عێراق کرد پاڵاوگەیەکی نەوتی وڵاتەکەی لە سۆماڵ نۆژەن بکاتەوە، کە زیاتر لە 50 ساڵ لەمەوبەر دروستکراوە، ئەوەش نهێنییەکە و زۆرینەی هاووڵاتیان نازانن کە عێراق خاوەندارێتی لە پاڵاوگەیەک لە سۆماڵ دەکات.

 

وێنە گەورەکە: ڕۆژی شەممە، ڕێککەوتی 17ـی 5ـی 2025، 34ـەمین لووتکەی عەرەبی لە بەغدا بەڕێوەچوو، لە کۆی 22 وڵاتی ئەندام لە کۆمکاری عەرەبی، بە عێراقەوە سەرۆک و کەسی یەکەمی تەنیا شەش وڵات ئامادەبوون، بەوەش بووە خراپترین لووتکە لەڕووی ئامادەبوونی سەرکردەی وڵاتانەوە.

 

لێدوانی فەرمی: نەبیل مەرسوومی، شارەزای ئابووری لە عێراق ڕایگەیاند، ئەم پاڵاوگەیە ساڵی 1974 لەلایەن حکومەتی عێراقەوە دروستکراوە و ساڵانە توانای پاڵاوتنی نزیکەی حەوت ملیۆن بەرمیلی هەیە، پاڵاوگەکە بە هاوبەشی لە نێوان سۆماڵ و عێراق دروستکراوە و ئەو کاتە حکومەتی عێراق هەموو پارەکەی داوە، بەگوێرەی ڕێککەوتنەکەش دوای سێ ساڵ لە بەرهەمهێنان، سۆماڵ بە سودێکی زۆر کەم، 50%ـی پشکی خۆی لە پارەی تێچووی پاڵاوگەکە داوە.

 

- بەوتەی ئەو شارەزایە، لە کۆبوونەوەی لووتکەی عەرەبیدا کە دوێنێ لە بەغدا بەڕێوەچوو، حەسەن شێخ مەحموود، سەرۆکی سۆماڵ داوای لە حکومەتی عێراق کردووە پاڵاوگەکە نۆژەن بکاتەوە تا دووبارە دەست بە بەرهەمهێنان بکاتەوە، "ئەم بابەتەش سوپڕایزی عێراق بووە لە لووتکەکەدا چونکە هیچ هاووڵاتییەکی عێراقی نەیزانیووە کە عێراق خاوەندارێتی لە پاڵاوگەیەک لە سۆماڵ دەکات".