كارەكانی سێ بەنداوی تەواونەكراو لە سلێمانی دەستپێدەكەنەوە

ئاڤا نیوز

وەزارەتی كشتوكاڵ و سەرچاوەكانی ئاو، ئامادەكاری دەكات بۆ دەستپێكردنەوەی كارەكانی سێ بەنداو كە قۆناغێكی زۆری دروستكردنیان بڕیوە.

چیرۆكی سەرەكی: لە شاری سلیمانی، بە بەشداری وەزیری كشتوكاڵ و سەرچاوەكانی ئاو و سەرۆکی دەستەی گەشتوگوزار و جێگری پارێزگاری سلێمانی و فەرمانگە پەیوەندیدارەکانی سلێمانی، کۆبوونەوەیەکی هاوبەش ئەنجامدرا، بەمەبەستی تاوتوێكردنی دۆخی ئاو و پڕۆژەی بەنداوەكان و ڕووبەڕووبوونەوەی وشكەساڵی.

لێدوانی فەرمی: بێگەرد تاڵەبانی، وەزیری كشتوكاڵ و سەرچاوەكانی ئاوی هەرێمی كوردستان ڕایگەیاند، ئامادەسازیی بۆ چۆنیەتی دەستپێكردنەوەی بەنداوەكانی: زەلان، چەقچەق و سەرچنار دەكەین كە قۆناغێكی باشی دروستكردنییان بڕیوە و هێشتا تەواو نەكراون.

ڕوونیشی كردەوە، دیراسەی كێشە و ئاڵنگارییەكانی بەردەم تەواوكردنی پرۆژەكان لەڕووی دارایی و تەكنیكییەوە دەكەین، هاوكات پاڵپشتی سەرچاوەی دارایی دەكەین بۆ ئەو كۆمپانیا جێبەجێكارانەی كەوا ئەركی دروستكردنی بەنداوەكانیان پێ سپێردراوە.

بابەتە ستراتیژییەكە: تەواوكردنی كارەكانی ئەو سێ بەنداوە و دروستكردنی ژمارەیەك بەنداو و پۆندی دیكە، لەچوارچێوەی پلانی ستراتیژیی كابینەی نۆیەمی حكومەتی هەرێمی كوردستانە بۆ ڕووبەڕووبوونەوەی وشكەساڵی و گۆڕانكارییەكانی كەشوهەوا، لەپێناو پاراستنی ئاسایشی ئاو و ئاسایشی خۆراك لە هەرێمی كوردستان.