لەنزیكترین كاتدا پارتی و یەكێتی لە ئاستی باڵا كۆدەبنەوە

ئاڤا نیوز

دوای سێ هەفتە لە بەڕێوەچوونی دوایین كۆبوونەوەی نێوانیان بۆ پێكهێنانی كابینەی نوێی حكومەت، بە ئەگەرێكی زۆرەوە ئەم هەفتەیە پارتی و یەكێتی كۆدەبنەوە، سەرپەرشتییاری شاندی دانووستانكاری هەردوو حیزبیش، ئەو زانیارییە دووپات دەكەنەوە.

وێنە گەورەكە: پارتی و یەكێتی وەك براوەی یەكەم و دووەمی هەڵبژاردنی پەرلەمانی كوردستان، لەماوەی ڕابروودا زنجیرەیەك كۆبوونەوەیان لە ئاستی باڵا و تیمی تەكنیكی بۆ پێكهێنانی كابینەی دەیەمی حكومەتی هەرێمی كوردستان کردووە، دوایین کۆبوونەوەی نێوانیشیان؛ بەسەرپەرشتیی مەسرور بارزانی، جێگری سەرۆکی پارتی و بافڵ تاڵەبانی، سەرۆکی یەکێتی، ڕۆژی 28ـی نیسانی 2025 لە قەزای دووکان بوو.

لێدوانی فەرمی: قوباد تاڵەبانی، كە سەرپەرشتیی شاندی دانوستانی یەکێتیی نیشتمانیی کوردستان بۆ پێکهێنانی کابینەی نوێی حکومەت دەکات، وتی: "داوام کردووە لەم هەفتەیە كۆبوونەوەی پارتی و یەكێتیی دەستپێبکەینەوە."

زانیاریی زیاتر: تاڵەبانی ڕوونیشیكردەوە، هۆشیار زێباری کە سەرپەرشتیی شاندی دانوستانی پارتی بۆ پێکهێنانی حکومەت دەکات، ئێستا لە سلێمانییە و بەیەكەوە باسی ئەوەمان کرد کە هەوڵ بدەین لەم هەفتەیەدا کۆبوونەوەی نێوان پارتی و یەکێتی بکرێت، بۆ ئەوەی نزیکتر ببینەوە لە پێکهێنانی حکومەت.''

لەلایەكی دیكەوە: هۆشیار زێباری، ئه‌ندامی ده‌سته‌ی كارگێڕیی مه‌كته‌بی سیاسیی پارتی دیموكراتی كوردستان ڕایگەیاند: چەندین کۆبوونەوەیان بۆ پێکهێنانی کابینەی نوێی حکومەتی هەرێمی کوردستان کردووە، کۆبوونەوەکان ئەرێنی بوون و هەوڵ دەدەن هەرچی زووە کابینەی نوێی حکومەت پێک بهێنن. پێموایە نزیکین لە پێکهێنانی کابینەی نوێی حکومەت و لەنزیكترین كاتدا لە ئاستی باڵا، دەست بە گفتوگۆكان دەكەینەوە.