بارهەڵگرێك لەسنووری سلێمانی پردێك تێکدەشکێنێت

ئاڤا نیوز

لەسەر ڕێگەی سەرەكی سلێمانی - كەركووك بەدیاریكراوی لە ناحیەی گۆپاڵە، بارهەڵگرێك كە بە ئاڕاستەی شاری سلێمانی بەرەو كەركووك ڕۆیشتووە، خۆی دەكێشێت بە بەرزەپردێكی پەڕینەوەی هاووڵاتیان و بەهۆیەوە پردەكە تێکدەشکێنێت.

چی ڕوویدا: ڕووداوەكە لە كاتژمێر 8:00ـی بەیانییەوە ڕوویداوە و ماوەی چەند كاتژمێرێكە ئاستەنگی هاتووچۆی بۆ شۆفێران دروستكردووە و جەنجاڵییەكی زۆر لە شەقامەكە دروستبووە، زیانی ماددیشی هەبووە، بەڵام خۆشبەختانە هیچ زیانێكی گیانی لێ نەكەوتووەتەوە.

زانیاریی بەدەستهاتوو: پەیامنێری ئاڤا چۆمان مەحموود، لە شوێنی ڕووداوەكە لە زاری ژمارەیەك شایەدحاڵێکەوە ئەو زانیارییەی دەستكەوت كە هۆكاری ڕووداوەكە بەرزبوونەوەی جەگی عارەبانەی بارهەڵگرێك بووە كە لە كۆنتڕۆڵ دەرچووە و ئاستی دیاریكراوی بەرزی تێپەڕاندووە و خۆی بە پردەكە كێشاوە، لەكاتی خۆپیاكێشانەكە دەنگێكی بەرزیشی هەبووە، كە بەشێك لە دانیشتووانی ناحیەی گۆپاڵەی هێناوەتە دەرەوە.

لێدوانی فەرمی: ئیسماعیل ئەحمەد، قایمقامی بازیان تایبەت بە ئاڤا ڕایگەیاند، بەهۆی ڕووداوەكە سایدێكی هاتووچۆ بەتەواوی گیراوە و سایدی دووەمیش مەترسی كەوتنی دواهەمین بەشی پردەكەی لەسەرە، بۆ كەمكردنەوەی جەنجاڵی لە شوێنی ڕووداوەكە، تیمەكانی هاتووچۆ ناچارن شۆفێران بەرەو ڕێگەی لاوەكیی خۆڵی تەنیشت ڕێگەی سەرەكی ئاڕاستە بكەن و بەشێوەیەكی كاتی ئەو ڕێگە لاوەكییە بە هەردوو ئاڕاستەی سلێمانی بۆ كەركووك و، كەركووك بۆ سلێمانی بەكاربهێنن.

زانیاریی زیاتر: هێزەكانی پۆلیس و ئاسایش و تیمەكانی بەرگری شارستانی و هاتووچۆ لە شوێنی ڕووداوەكەن، سەرقاڵی لابردنی پارچەکانی پردەكەن لەسەر ڕێگەی هاتووچۆ.