کرێملن: بەردەوامی بە دانوستانەکان دەدەین و ڕێگەچارەی ئاشتی بژاردەی ڕووسیایە

ئاڤا نیوز

کۆشكی کرێملن ڕایدەگەیێنێت بەهێزکردنی پەیوەندییەکانی نێوان هەردوو سەرۆکی ڕووسیا و ئۆکراینا کاریگەری مەزنی لەسەر کەمکردنەوەی ناکۆکیەکان دەبێت و ڕێگەچارەی ئاشتی بژاردەی ڕووسیایە.

وێنە گەورەکە: ئاسایبوونەوەی پەیوەندییەکانی نێوان ڕووسیا و ئەمریکا بەرەو قۆناغێکی گرنگ هەنگاو دەنێت، دۆناڵد ترەمپ سەرۆکی ئەمریکا ئامانجی 100 ڕۆژی سەرەتای کارکردنی بە ئاسایکردنەوەی پەیوەندییەکان لەگەڵ ڕووسیا و کۆتایهێنان بە جەنگی ئۆکراینا دیاریکرد، ئێستاش لە هەوڵەکانی بۆ بەدیهێنانی ئەو ئامانجە بەردەوامە و لەو چوارچێوەیەدا ئەمڕۆ پەیوەندییەکی تەلەفۆنی لەگەڵ ڤلادیمێر پووتین، سەرۆکی ڕووسیا ئەنجام دەدات.

لێدوانی فەرمی: دیمیتری پیسکۆڤ، وتەبێژی کۆشکی کریملن بە کەناڵی یەکی ڕووسیای ڕاگەیاند: بەدیهێنانی ئامانجەکانی ڕووسیا لە ڕێگەی سیاسی و دیپلۆماسیەوە بژاردەی سەرەکی ڕووسیایە و دەمانەوێت بە ڕێگەچارەی ئاشتی کۆتایی بە جەنگ و ناکۆکیەکان بێنین لە بری گۆڕەپانی جەنگ، مۆسکۆ بەو ئاراستەیە هەنگاو دەنێت و لە دانوستانەکان بەردەوام دەبێت.

زانیاریی زیاتر: دیمیتری پیسکۆڤ، وتەبێژی کۆشکی کرێملن سەبارەت بە هەوڵەکانی دۆناڵد ترەمپ گوتی: هەوڵەکانی ترەمپ و ئەمریکا بەرز دەنرخێنین بۆ کۆتایهێنان بە جەنگی نێوان ڕووسیا و ئۆکراینا، لەو چوارچێوەیەدا بڕیار وایە لە کاتژمێر 5ـی ئێوارەی ئەمڕۆ سەرۆک ترەمپ پەیوەندی بە سەرۆک پووتینەوە بکات و سەبارەت بە دانوستانەکان و کۆتایهێنان بە جەنگ گفتووگۆ بکەن.