ئاڤا بەدواداچوون بۆ پرسی مۆڵەتی ماتۆڕسکیلەکانی هەڵەبجە دەکات

ئاڤا نیوز

لە سنووری پارێزگای هەڵەبجە ئەو ماتۆڕسکیلانەی مۆڵەتیان نییە دەستیان بەسەردا دەگیرێت. ئاڤا بەدواداچوون بۆ ئەو کێشەیە دەکات.

چیرۆکی سەرەکی: ژمارەیەک هاونیشتمانیی سنووری پارێزگای هەڵەبجە کە ماتۆڕسکیلیان هەیە، گازەندەی خۆیان گەیاندووەتە ئاڤا، وەک خۆیان دەڵێن بەڕێوەبەرایەتیی هاتووچۆی هەڵەبجە نە مۆڵەتی شۆفێرییان پێ دەدات، نە ماتۆڕەکانیان تۆمار دەکات، داوایان کرد ئەم کێشەیان لە ڕێی ئاڤاوە بۆ چارەسەر بکرێت.

لێدوانی فەرمی: ڕێبوار عومەر، لێپرسراوی بەشی ڕاگەیاندنی بەڕێوەبەرایەتیی هاتووچۆی هەڵەبجە، بە ئاڤا میدیای ڕاگەیاند: مۆڵەتی لێخوڕینی ماتۆڕسکیل بە ئەو هاووڵاتیانە دەدەین کە تەمەنی 16 ساڵییان تەواوکردبێت، هەر کەسێک ئارەزوومەندبێت دەتوانێت سەردانی بەشی مۆڵەتی بەڕێوەبەرایەتیمان بکات، بەگوێرەی ڕێنماییەکان دەبێت بە خاوەنی مۆڵەت.

- ئەو ماتۆڕانەی بەشێوەیەکی یاسایی لە خاڵە سنوورییەکانەوە هێنراونەتە نێو هەرێمی کوردستان و شۆفێرەکەی مۆڵەتی لێخوڕینی هەیە و خەڵک هەراسان ناکات، ئێمە هیچ تەداخولی ناکەین.

- هەر کەسێک مۆڵەتی شۆفێری نەبێت و ماتۆڕەکەشی بێ ژمارە و بێ بەڵگەنامە بێت، ئەوا شۆفێرەکە دەدرێتە دادگا، هەروەها دەست بەسەر ماتۆڕەکەیدا دەگیرێت و پان دەکرێتەوە و دواتر بە نرخی ئاسن دەفرۆشرێت.

ئەوەی پێویستە بیزانیت: ساڵانە لە سنووری پارێزگای هەڵەبجە دەست بەسەر 250 تا 300 ماتۆڕێ بێ سەرەتا و بێ ژمارەدا دەگیرێن و پان دەکرێنەوە، دواتر بە نرخی ئاسن لە بازاڕدا دەفرۆشرێن.