مەسرور بارزانی و وەزیری دەرەوەی ئەمریکا کۆدەبنەوە

ئاڤا نیوز

 

لەچوارچێوەی سەردانەکەیدا بۆ ئەمریکا، بڕیارە ڕۆژی هەینی سەرۆکوەزیران مەسرور بارزانی لەگەڵ وەزیری دەرەوەی ئەمریکا، مارکۆ ڕۆبیۆ کۆببنەوە و گفتوگۆ لەبارەی پەیوەندییەکانی نێوان ئەمریکا و هەرێمی کوردستان بکەن.

 

لێدوانی فەرمی: تریفە عەزیز، نوێنەری حکومەتی هەرێمی کوردستان لە ئەمریکا بە ئاڤا میدیای ڕاگەیاند "بڕیارە ڕۆژی هەینی، سەرۆکوەزیران مەسرور بارزانی لەچوارچێوەی سەردانەکەیدا بۆ واشنتن لەگەڵ مارکۆ ڕۆبیۆ، وەزیری دەرەوەی ئەمریکا کۆببێتەوە".

 

تریفە عەزیز لەبارەی ناوەرۆکی کۆبوونەوەکەی سەرۆکوەزیرانی کوردستان و وەزیری دەرەوەی ئەمریکا گوتی، " وەزیری دەرەوەی ئەمریکا دەیەوێت گوێی لە بۆچوونەکانی سەرۆکوەزیران بێت، لە کۆبوونەوەکەدا گفتوگۆ دەکەن لەبارەی ئاسایش و ئارامی ڕۆژهەڵاتی ناوەڕاست، گۆڕانکارییەکانی ناوچەکە، ڕۆڵی ئەرێنی هەرێمی کوردستان لە پاراستنی سەقامگیریی دۆخی ناوچەکە".

 

نوێنەری حکومەتی هەرێمی کوردستان ڕاشیگەیاند، "ئێمە لەگەڵ ئەمریکا لە بوارەکانی پاراستنی ئارامی و ئاسایشی ناوچەکە و ڕۆژهەڵاتی ناوەڕاست لە یەک بەرەداین".

 

زانیاریی زیاتر: بەگوتەی نوێنەری حکومەتی هەرێمی کوردستان لە ئەمریکا، تەوەرێکی دیکەی گفتوگۆکانی سەرۆکوەزیران مەسرور بارزانی و مارکۆ ڕۆبیۆ، پرسەکانی وزە و گەشەپێدان و وەبەرهێنان دەبێت.