ماریا زاخارۆڤا بۆ ئاڤا: ڕووسیا پێشوازی لە چەکدانانی پەکەکە دەکات

ئاڤا نیوز

ڕووسیا پێشوازی لە ڕاگەیێنراوی کۆنگرەی پەکەکە بۆ چەکدانان و خۆهەڵوەشاندنەوە دەکات و دەڵێت، ئەم هەنگاوە چارەسەری ململانێی لەمێژینە و کۆتاییهێنان بە توندوتیژی دەکات.

وێنە گەورەکە: بڕیاری پەکەکە بۆ چەکدانان و خۆهەڵوەشاندنەوە بە قۆناغێکی نوێ و گرنگ دادەنرێت بۆ کورد لە باکووری کوردستان و تورکیا، نەمانی شەڕ و سەرکەوتووبوونی پرۆسەی ئاشتی دەبێتە هۆی سەقامگیری بۆ هەر چوار پارچەی کوردستان و تەواوی ڕۆژهەڵاتی ناوەڕاست، بۆیە زۆربەی وڵاتانی جیهان پێشوازی و پشتیوانی لێ دەکەن و بە دەرفەتێکی مێژوویی دەبینن.

لێدوانی فەرمی: ماریا زاخارۆڤا، وتەبێژی وەزارەتی دەرەوەی ڕووسیا بە ئاڤا میدیای ڕاگەیاند، "پێشوازی لە هەر هەنگاوێک دەکەین کە ئامانج لێی چارەسەرکردنی ململانێی لەمێژینە و کۆتاییهێنان بە توندوتیژییە".

- "ڕووسیا ئارەزووی پاراستن و بەهێزکردنی سەقامگیری کۆمەڵایەتی-سیاسی لە تورکیای دراوسێ و هاوبەشی گرنگمان دەکات، پێمانوایە کە چارەسەرکردنی هەموو کێشەکانی ئێستای تورکیا لەڕێگەی گفتوگۆی دیموکراسی ئاشتییانە، دابینکردنی ماف و ئازادییەکانی هەموو نەتەوە و ئاینییەکان بە شێوەیەکی متمانەپێکراو، خزمەت بە بەرژەوەندی هەموو گەلی تورکیا دەکات و بەشدار دەبێت لە بەهێزکردنی ئارامی و ئاسایش لە ناوچەکەدا".

باکگراوند: دوای بانگەوازەکەی عەبدوڵڵا ئۆجەلان لە 27ـی شووباتی ئەمساڵ، لە 5 بۆ 7ـی ئەم مانگە پەکەکە 12ـیەمین کۆنگرەی خۆی بەست، ڕۆژی 12ـی مانگیش بڕیارەکانی کۆنگرەی ئاشکرا کرد و ڕایگەیاند، خۆیان هەڵدەوەشێننەوە و کۆتایی بە خەباتی چەکداری دەهێنن، ئەمەش کاردانەوەی ناوخۆیی و جیهانی بەدوای خۆیدا هێنا و زۆربەی وڵاتان پێشوازی لەو بڕیارەدەکەن.