لە هەولێر پانێڵی "فرەیی هێزە" بەڕێوەدەچێت

ئاڤا نیوز

لە هەولێر پانێلێکی تایبەت بە فرەچەشنی کولتووری بۆ دیالۆگ و گەشەپێدان بەڕێوەدەچێت و نوێنەری چەند پێکهاتەیەکی کوردستان بەشداریی تێدا دەکەن.

وێنە گەورەکە: ڕۆژی 21ی ئایار لەلایەن نەتەوە یەکگرتووەکانەوە بە ڕۆژی جیهانیی "فرەچەشنی کولتووری بۆ دیالۆگ و گەشەپێدان" دەستنیشانکراوە، مەبەست لێی پەرەپێدانی تێگەیشتن و هۆشیارییە لەمەڕ بایەخی فرەچەشنی کولتووری و هاندانی دیالۆگ و پێکەوەژیانی گەلان، هەرێمی کوردستانیش ناوەندێکی گرنگی پێکەوەژیانە لە ناوچەکە.

چیرۆکی سەرەکی: کتێبخانەی ماڵی وەفایی لە شاری هەولێر پانێلێکی تایبەت بە ناونیشانی "فرەیی هێزە" ساز دەکات، تێیدا بەڕێوەبەری پێکەوەژیانی ئایینی، کەسایەتیی کریستییانەکان، بەڕێوەبەریی گشتیی ڕۆشنبیری و هونەری تورکمان، توێژەر و ئەکادیمیی دیکە بەشدار دەبن، گفتوگۆ لەبارەی پێکەوەژیان دەکەن لە کوردستان.

لێدوانی فەرمی: ڕێبین فەتاح، بەڕێوەبەری ماڵی وەفایی بە ئاڤای ڕاگەیاند: هەرێمی کوردستان کۆمەڵگەیەکی فرەڕەنگ و فرەدەنگ و کولتوور و ئایینی جیاوازە، بۆیە بیرمان لەوە کردووەتە بە ئاراستەی پەرەپێدانی زیاتری دیالۆگ و پێکەوەژیان پانێلێک لە نێوان نوێنەری پێکهاتە و لایەنە پەیوەندیدارەکان ڕێک بخەین.

- دەمانەوێت قسە لەسەر ئەو ئاڵنگارییانە بکەین کە دێنە بەردەم پرۆسەی پێکەوەژیانی ئاشتییانە، هەروەها تیشک دەخەینە سەر چۆنیەتیی ڕووبەڕووبوونەوەیان.

- ئەم جۆرە دیالۆگانە بۆ کۆمەڵگەی کوردستان بە گشتی و هەولێر بە تایبەتی گرنگن، چونکە هەولێر کۆمەڵگەیەکی فرە پێکهاتەیە و پایتەختی سیاسیی هەرێمی کوردستانە، جگە لەوەش شوێنگەی ئەو جۆرە گفتوگۆیانەیە لە ڕای گشتیدا.