دابەشکردنی ئاو بۆ 80%ـی گەڕەکەکانی سلێمانی ڕادەگیرێت

ئاڤا نیوز

بەهۆی کارکردن لە پڕۆژەی پاککردنەوەی وەرگری ئاوی هەردوو هێڵی یەک و دووی دووکان -  سلێمانی، دابەشکردنی ئاو بۆ 80%ـی گەڕەکەکانی سلێمانی ڕادەگیرێت و بەڕێوەبەری ئاویش دەڵێت، ڕاگرتنەکە کاتییە.

چیرۆکی سەرەکی: هێلەکانی یەک و دووی دووکان - سلێمانی، سەرچاوەی سەرەکی دابینکردنی ئاوی خواردنەوەی سلێمانین، بەهۆی کەڵەکەبوونی لم و پاشماوەی گەشتیاران لە ئاوی دووکاندا، سەرچاوە ئاوییەکە پیسبووە و بەهۆی پڕۆژەی پاککردنەوەکەشی بۆماوەی 24 کاتژمێر ڕاکێشانی ئاو لە هەردوو هێڵەکە ڕادەگیرێت.

لێدوانی فەرمی: بەختیار تاهیر، بەڕێوەبەری ئاوی سلێمانی، ڕایگەیاند، "ئاگاداری هاووڵاتییان دەکەینەوە ئەمڕۆ چوارشەممە، دابەشكردنی ئاو لە هەردوو هێڵی یەك و دووی ئاوی دووكان – سلێمانی ڕاگیراوە، ئەم ڕاگرتنەش ماوەی 24 کاتژمێر دەخایەنێت".

زانیاریی زیاتر: "هۆکاری گرتنەوەی ئاوەکە بۆ پاككردنەوەی وەرگری ئاوی هەردوو هێڵەکەیە کە بەهۆی کۆبوونەوەی لم و پاشماوەی گەشتیاران پیسبووە".