ئەمساڵ بەردەڕەش 300 هەزار تۆن پەتاتە بەرهەمدەهێنێت

ئاڤا نیوز

لە سنووری قەزای بەردەڕەشی پارێزگای دهۆک، 25 هەزار دۆنم پەتاتە چێنراوە و لەئێستادا هەڵکەندنی دەستپێکردووە.

وێنە گەورەکە: لە کابینەی نویەمی حکومەتی هەرێمی کوردستان گرنگییەکی تایبەت بە بواری بەرهەمی کشتوکاڵی دراوە و هەناردەی دەرەوەش کراوە، بەرووبوومی پەتاتەش نزیکەی پێنج ساڵە گەشەی کردووە، دەشتی ناوکوڕ لە سنووری قەزای بەردەڕەش زۆرترین ڕێژەی پەتاتەی لێ دەچێنرێت.

لێدوان فەرمی: ئەندازیار تەحسین سلێمان، بەڕێوەبەری کشتوکاڵی بەردەڕەش بە ئاڤا میدیای ڕاگەیاند، لە 20ـی مانگەوە هەڵکەندنی پەتاتە دەستپێکردووە و هەتا مانگی هەشت بەردەوام دەبێت، لە سنووری قەزای بەردەڕەش 25 هەزار دۆنم زەوی بە پەتاتە چێنراوە بە هەردوو جۆری خواردن و پیشەسازی، پێشبینی دەکەین زیاتر لە 300 هەزار تۆن بەرهەمی ببێت.

زانیاریی زیاتر: بەڕێوەبەری کشتوکاڵی بەردەڕەش دەڵێت، ساڵانە کەرتی تایبەت بە هەماهەنگی لەگەڵ حکومەتی هەرێمی کوردستان نزیکەی چوار تا هەشت هەزار تۆن پەتاتە ڕەوانەی دەرەوەی وڵات دەکات، هاوکات ڕێژەیەکی زۆر بۆ ناوەڕاست و خوارووی عێراق دەنێردرێت.

ئەوەی پێویستە بیزانیت: ئەمساڵ گۆڕانکاری کەش و هەوا و نەخۆشی، هیچ کاریگەری لەسەر پەتاتە نەبووە و پەتاتەیەکی زۆر باش بەرهەم هاتووە.