مەسرور بارزانی و سێناتۆرێكی ئەمریكی چاكسازییەكانی وەزارەتی پێشمەرگە تاوتوێ دەكەن

ئاڤا نیوز

سەرۆكی حكومەتی هەرێمی كوردستان لەگەڵ سێناتۆرێكی ئەمریكی، چاكسازییەكانی حكومەتی هەرێمی كوردستان و  وەزارەتی پێشمەرگە بەتایبەت تاوتوێ دەكات.

چیرۆكی سەرەكی: لەمیانی گەشتەكەی بۆ واشنتن، ئەمڕۆ چوارشەممە 2025-05-21، مەسرور بارزانی، سەرۆکی حکومەتی هەرێمی کوردستان، لەگەڵ سێناتۆر ئەلیسا سلۆتکین کۆبووەوە.

ڕاگەیێنراوی فەرمی: بەپێی ڕاگەیێنراوی حكومەتی هەرێمی كوردستان، لەو دیدارەدا باس لە چاکسازییەکانی حکومەت بەگشتی و چاکسازییەکانی وەزارەتی پێشمەرگە بەتایبەت كرا. هەردوولا هاوڕابوون لە سەر گرنگیی و پێویستیی بەردەوامبوونی پشتیوانیکردنی هێزی پێشمەرگە بۆ ڕووبەڕووبوونەوەی تیرۆریستان.

زانیاریی زیاتر: ڕێزگرتن لە قەوارەی دەستووریی هەرێمی کوردستان و دابینکردنی ماف و شایستە داراییەکانی خەڵکی کوردستان لەلایەن حكومەتی عێراقەوە، بەشێكی دیكەی گرنگی گفتوگۆكان بوو.

ئەمەش بزانە: دۆخی بەیەکەوەژیانی ئاشتییانەی نێوان پێکهاتە جیاوازەکان و ئازادی ئایینی لە هەرێمی کوردستان و عێراق، تەوەرێکی دیکەی گفتوگۆکانی دیدارەکە بوو.

ئەوەی پێویستە بیزانیت: سەرۆكی حكومەتی هەرێمی كوردستان لە ڕۆژانی ڕابردوودا، دیداری لەگەڵ 11 سێناتۆر و كۆنگرێسمانی ئەنجوومەنی نوێنەرانی ئەمریكا ئەنجام داوە و لە سەرجەم دیدارەكاندا، پشتیوانی ئەمریكا بۆ كوردستانێكی بەهێز دووپات كراوەتەوە.