دەستەی دەستپاكیی کوردستان: 421 بەرپرسی حكومی گەندەڵییان بەسەردا ساغبووەتەوە

ئاڤا نیوز

سەرۆكی دەستەی دەستپاكی تایبەت بە ئاڤا ئاشكرای دەكات، لەماوەی ڕابردوودا 421 بەرپرسی حكومی دۆسیەی گەندەڵییان بەسەردا ساغبووەتەوە و لە دادگا سزا دراون.

چیرۆکی سەرەکی: لەمیانی بەشداریكردنی لە بەرنامەی مۆری ئاڤا، ئەحمەد ئەنوەر، سەرۆكی دەستەی دەستپاكی هەرێمی كوردستان، وەڵامی ژمارەیەك پرسیاری تایبەت بە بنبڕكردنی دیاردەی گەندەڵی و كردنەوەی دۆسیە لەسەر گەندەڵكاران دایەوە.

ئەوەی پێویستە بیزانیت: لەچوارچێوەی ئەركی ڕۆتینیی خۆیدا بۆ ئاشكراكردنی بەرژەوەندییە داراییەكان، دەستەی دەستپاکی هەرێمی کوردستان، پاڵپشت بە ماددەی 14 لە ڕێنماییەكانی ئاشكراكردنی ئەستۆی دارایی ژمارە (2)ـی ساڵی 2016، ساڵانە ژمارەیەک بەرپرسی پلەباڵا بۆ لێکۆڵینەوە لە سەروەت و سامانیان، بانگهێشت دەکات.

لێدوانی فەرمی: ئەحمەد ئەنوەر ڕایگەیاند، بەهۆی ئەو سەدان دۆسیانەی لەماوەی ڕابردوودا ئێمە لە دەستەی دەستپاكی جووڵاندوومانە؛ 421 بەرپرسی حكومی، گەندەڵییان بەسەردا ساغبووەتەوە و بە بڕیاری كۆتایی دادگا، سزا دراون.

زانیاریی زیاتر: بەڕێوەبەرە گشتییەكانی خانەنشین و ڕاوێژكارانی حكومی و فەرمانبەرانی پلە تایبەت و پلە یەك، بۆ زانینی سەروەت و سامانەكانیان، ساڵانە فۆرمی ئاشكراكردنی ئەستۆی دارایی پڕ دەكەنەوە و دەستەی دەستپاكی کوردستانیش بەگوێرەی داتاكانی نێو فۆرمەكە، هەڵسەنگاندنی دارایی بۆ فۆرمە گەڕاوەكان دەكات.