لە چوار ساڵدا زیاتر لە سێ هەزار بازرگانی ماددەی هۆشبەر لە هەرێمی كوردستان دەستگیر كراون

ئاڤا نیوز

 

لە ماوەی چوار ساڵدا لە هەرێمی کوردستان چەندین تۆڕی بازرگانیکردن بە ماددەی هۆشبەر هەڵوەشێنراونەتەوە، هاوکات زیاتر لە 3300 بازرگانی ئەو ماددەیە دەستگیرکراون.

 

وێنە گەورەكە: یەكێك لە كارە لەپێشینەكانی كابینەی نۆیەمی حكومەت بە سەرۆكایەتیی سەرۆكوەزیران مەسرور بارزانی، بریتی بووە لە كاركردن بۆ بنەبڕكردنی ماددەی هۆشبەرە، لەم چوارچێوەیەدا لە ماوەی چەند ساڵێكی كەمدا هەزاران تۆمەتبار كە نزیكەی نیوەیان بازرگانی ماددەی هۆشبەر بوونە دەستگیر كراون.

 

لێدوانی فەرمی: نەقیب ئەركان بیبانی، گوتەبێژی بەڕێوەبەرایەتیی نەهێشتنی ماددە هۆشبەرەكان بە ئاڤا میدیای ڕاگەیاند: كابینەی نۆیەمی حكومەت بەرەنگاربوونەوەی ماددەی هۆشبەری لەپێشینەی كارەكانی داناوە، لە ساڵی 2022ـەوە دەستمان بە هەڵمەتێكی زۆر چڕ و فراوانی دەستگیركردنی بازرگانانی ماددەی هۆشبەر كرد، هەروەها بە چڕی كارمان لەسەر  ئەو ڕێڕەوانە كرد كە ماددەی هۆشبەریان لێ دەگواسترێتەوە.

 

نەقیب ئەرکان بیبانی دەشڵێت، "چەندین تۆڕی بازرگانیی نێودەوڵەتیمان لێك هەڵوەشاندووەتەوە و سەرجەم ئەندامەكانیانمان دەستگیر كردووە، چالاكییەكانی ئێمە جگە لە هەرێمی كوردستان و عێراق پەڕیونەتەوە دەرەوەی وڵاتیش، توانیومانە چەندین تۆمەتبار لە دەرەوەی وڵات دەستگیر بكەین و بیانهێنینەوە لە هەرێمی كوردستان دادگاییان بكەین.

 

لەبارەی ئاماری چوار ساڵی چالاکییەکانیان، گوتەبێژی بەڕێوەبەرایەتیی نەهێشتنی ماددە هۆشبەرەكان دەڵێت، "له ساڵى 2022 تا مانگى چوارى ئەمساڵ، تەنیا لە سنووری پارێزگاکانی هەولێر و دهۆک شەش هەزار و 700 تۆمەتبار دەستگیر كراون، لەو ژمارەیەش سێ هەزار و  306 تۆمەتباریان بازرگانی ماددەی هۆشبەر بوونە.