تووشبوویەکی دیکەی تای خوێنبەربوون لە دهۆک تۆمار کرا

ئاڤا نیوز

 

تووشبوویەکی دیکەی تای خوێنبەربوون لە دهۆک تۆمار کرا، تووشبووەکە بەڕەگەز ئافرەتە و خوشکی ئەو هاونیشتمانییەیە کە لە ماوەی ڕابردوودا بەهۆی هەمان نەخۆشییەوە گیانی لەدەست دا.

چیرۆکی سەرەکی: دوای ئەوەی ئەو ژنە بە گومانی تووشبوونی بە تای خوێنەربوون بۆ ماوەیی سێ ڕۆژ لە نەخۆشخانەی ئازادی لە دهۆک داخڵکرا، ئەمڕۆ دوای گەڕانەوەی ئەنجامی پشکنینەکانی، دەرکەوت هەڵگری نەخۆشییەکەیە.

 

وێنە گەورەکە: ماوەیەکە ڤایرۆسی تای خوێنبەربوون لە  عێراق و هەرێمی کوردستان بڵاوبووەتەوە، لە عێراق 73 کەس تووشبوون. هەرچی هەرێمی کوردستانە، تەنیا دوو تووشبوو تۆمارکراون، یەکێکیان چاکبووەتەوە و ئەوی دیکەشیان گیانی لەدەست دا کە خەڵكی دهۆک بوو.

 

لێدوانی فەرمی: د. سەگڤان حەسەن، بەرپرسی هۆبەی نەخۆشییە گوازراوەکان لە بەڕێوەبەرایەتیی تەندروستیی دهۆک بە ئاڤا میدیای ڕاگەیاند، تووشبوویەکی دیکەی تای خوێنەربوون لە دهۆک تۆمار کرا. گوتیشی تووشبووەکە خوشکی هەمان ئەو کەسەیە کە لە ڕۆژی 10ـی ئەم مانگە بەهۆی تای خوێنبەربوونەوە لە شیلادزێ گیانی لەدەست دا و بەرکەوتووی خوشکەکەی بووە.

 

زانیاریی بەدەستهاوو: تووشبووەکە تەمەنی لەنێوان 40 بۆ 45 ساڵیدایە و خەڵكی ناحیەی شیلادزێیە لە سنووری قەزای ئامێدی لە پارێزگای دهۆک.

 

لەلایەکی دیکەوە: تای خوێنبەربوون لە عێراق ڕوو لە هەڵکشانە و کۆی گشتیی تووشبوون بە تای خوێنبەربوون گەیشتووە 73 حاڵەت و پشکی شێریش بەر پارێزگای زیقار کەوتووە بە ڕێژەی 34% لە کۆی تووشبووان.