ئەمساڵ لە عێراق 73 تووشبووی تای خوێنبەربوون تۆمارکراون

ئاڤا نیوز

 

کۆی گشتیی تووشبوون بە تای خوێنبەربوون ئەمساڵ لە عێراق گەیشتە 73 تووشبوو، پشکی شێر بە پارێزگای زیقار کەوتووە بە ڕێژەی 34٪ لە کۆی تووشبووان.

 

چیرۆکی سەرەکی: چەند مانگێکە ڤایرۆسی تای خوێنبەربوون لە پارێزگاکانی عێراق و هەرێمی کوردستان بڵاوبووەتەوە، کە لەڕێگەی ئاژەڵەوە دەگوازرێتەوە، تاوەکو ئێستا 73 تووشبوو تۆمارکراون و 5 کەسیش گیانیان لەدەست داوە،  لە سنووری پارێزگای دهۆکیش، ژنێکی تەمەن 45 ساڵ گیانی لەدەست دا.

 

لێدوانی فەرمی: د. سائر ئەسەدی، بەڕێوەبەری بەشی نەخۆشییەکان لە بەڕێوەبەرایەتیی گشتیی ڤێرتێرنەری لە بەغدا بە ئاڤا میدیای ڕاگەیاند: بۆ سێیەم ساڵ لە دوای یەک پارێزگای زیقار لە پێشەوەی سەرجەم پارێزگاکان دێت لە ڕووی ڕێژەی تووشبوون نە نەخۆشیی تای خوێنبەربوون، ئەمساڵ لە کۆی 73 تووشبوو 25 تووشبوو لە زیقار تۆمار کراوە لەوانەش یەک گیانلەدەستدان.

 

هۆکارە زانراوەکان: خراپی هۆشیاریی تەندروستی لای هەندێک لە بەخێوکەرانی ئاژەڵ و خراپی پاکوخاوێنی ناو کێڵگەکان، بووەتە ژینگەیەکی لەبار بۆ بڵاوبوونەوەی نەخۆشییەکان بەتایبەتی تای خوێنبەربوون .

 
خاڵە ئەرێنییەکان: تاوەکو ئێستا تای خوێنبەربوون لە پارێزگاکانی نەجەف و سەڵاحەددین تۆمار نەکراوە.

 

ئەمەش بزانە: لە ساڵی 2023 نزیکەی 580 تووشبوو بە تای خوێنبەربوون لە عێراق جگە لە هەرێمی کوردستان تۆمار کران، لە ساڵی 2024یش 202 حاڵەت تۆمار کراون.

 

لەلایەکی دیکە: ڕێککەوتی 10ـی 5ـی 2025، تەندروستیی دهۆک، تۆمارکردنی یەکەم گیانلەدەستدانی بە تای خوێنبەربوون لە پارێزگاکە ڕاگەیاند کە ژنێکی تەمەن 45 ساڵ بوو.

 

باکگراوند: تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە، نیشانەکانی نەخۆشییەکە بریتین لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست، بە نەخۆشییەكی كوشندە هەژماردەكرێت و تا ئێستا چەندین کەسیش بەو نەخۆشییە گیانیان لەدەستداوە.