سوودانی دەستپێکردنی ستراتیژی ئاسایشی نیشتمانی پێنج ساڵەی ڕاگەیاند

ئاڤا نیوز

محەممەد شیاع سوودانی، سەرۆکوەزیرانی عێراق، دەستپێکردنی ستراتیژی ئاسایشی نیشتمانی پێنج ساڵەی ڕاگەیاند.

چیرۆکی سەرەکی: ڕۆژی پێنجشەممە 2025-5-22، محەممەد شیاع سوودانی، سەرۆکوەزیرانی عێراق، دەستپێکردنی ستراتیژیەتی ئاسایشی نیشتمانی (2025-2030)ـی ڕاگەیاند و ئاماژەی بەوەدا کە ئامانجی ستراتیژییەکە دروستکردنی هاوبەشی نێودەوڵەتیی هاوسەنگە.

ئەوەی پێویستە بیزانیت: ئامانجی ستراتیژیی ئاسایشی نیشتیمانی عێراق، لەبەرچاوگرتنی گۆڕانکارییە هەنوكەییەكانی ناوچەکە و ئاڵنگارییە ئەمنیە ناوخۆیی و دەرەكییەكانە، بەجۆرێک كە پابەند بێت بە بنەما سەرەکییەکانی دەستوور و ئەو یاسایانەی کە پەیوەستن بە ڕێكخستنی مافەکانی مرۆڤ و پاراستنی  هاووڵاتییان.

لێدوانی فەرمی: محەممەد شیاع سوودانی ڕایگەیاند: پیرۆزبایی لە دەستەبژێری نیشتمانی دەکەم کە لە هەموو دامودەزگاکانی دەوڵەتەوە بۆ جێبەجێکردنی ئەم ستراتیژە ڕاسپێردراون. پشتیوانی جددی خۆمان بۆ جێبەجێکردنی ئەم ئەرکە ڕادەگەیەنین.

٠ گرنگی ئەم ستراتیژە لە پاراستنی بەرژەوەندییە باڵاکانی وڵات و بوونیادنانی ئابوورییەکی هەمەچەشن و بەردەوام و پەسەندکردنی سیستەمێکی خزمەتگوزارییە کە لەگەڵ خواستەکانی خەڵکدا بگونجێت.

٠ هەموومان بەرپرسیارێتی بوونیادنانەوە و پاراستنی نیشتمان و پیرۆزییەکانی لە ئەستۆ دەگرین، بەپێی عێراقێکی ئاسایش و تەواو سەروەر، بۆ گەیشتن بە سەقامگیری و گەشەسەندن.