ئاڤا گرفت و داواکاریی هاووڵاتیانی سۆران دەگەیێنێتە لایەنی پەیوەندیدار

ئاڤا نیوز

 

ئاڤا گرفت و داواکاریی هاونیشتمانیانی ئیدارەی سەربەخۆی سۆران بۆ قیرتاوکردنی شەقامەکانیان دەگەیێنێتە لایەنی پەیوەندیدار. بەرپرسێکی ئیداریی شارەکەش لە ڕێگەی ئاڤاوە وەڵامی داواکارییەکەیان دەداتەوە.

 

چیرۆکی سەرەکی: دانیشتووانی گەڕەکی بارزان لە سۆران داوای جێبەجێکردنی پرۆژەی خزمەتگوزاری و قیرتاوکردنی شەقامەکانیان دەکەن، هەروەها دانیشتووانی گەڕەکەکانی دیکەش کێشەی کۆنەکردنەوەی زبڵ و خاشاکیان هەیە لە کۆڵەنەکان.

 

لێدوانی فەرمی: هەژار حەکیم، بەڕێوەبەری ڕاگەیاندنی ئیدارەی سەربەخۆی سۆران بە ئاڤای ڕاگەیاند: لە ماوەیەکی نزیکدا ئەو پرۆژانە دەستپێدەکەنەوە کە ڕاگیراون، خزمەتگوزاری و قیرتاوکردن لەو گەڕەکانە دەستپێدەکات کە پێویستیانە.

 

لەبارەی کەڵەکەبوونی زبڵ و خاشاک، هەژار حەکیم گوتی، کێشەیەک لە گرێبەستی ئەو کۆمپانیایە هەبوو کە زبڵ و خاشاکیان لە گەڕەکەکانی سۆران کۆدەکردەوە، بۆیە چەند ڕۆژێکە زبڵ و خاشاک کۆنەکراوەتەوە.

 

ئەوەی پێویستە بیزانیت: کێشەی ئەو کۆمپانیایە بە تەواوی چارەسەرکراوە و درەنگانی شەوی ڕابردووەوە لەنێو بازاڕ و گەڕەکەکانی سۆران دەستکراوە بە کۆکردنەوەی زبڵ و خاشاک، پێشبینی دەکرێت ئەو شوێنانە تا سبەی بە تەواوی پاک بکرێنەوە.