هێزی ئاسمانی عێراق پێگەیەکی چەکدارانی داعش لە چیای پەلکانە بۆردوومان دەکات

ئاڤا نیوز

 

هێزی ئاسمانی عێراق بە فڕۆکەی جۆری F16 پێگەیەکی پاشماوەی چەکدارانی داعش بۆردوومان دەکات و بەهۆیەوە چەند چەکدارێکی ئەو ڕێکخراوە دەکوژرێن. 

 

وێنە گەورەکە: هەرچەندە زیاتر لە حەوت ساڵ بەسەر کۆتاییهاتنی ڕێکخراوی داعش لە عێراق تێدەپەڕێت، بەڵام تاوەکو ئێستا شانە نوستووەکانی ڕێکخراوەکە جار جار هێزە ئەمنییەکان و هاووڵاتییانی مەدەنی بەئامانج دەگرن. 

 

ڕاگەیێنراوی فەرمی: شانەی ڕاگەیاندنی ئەمنیی عێراق بڵاویکردەوە: دوای کۆکردنەوەی زانیاریی هەواڵگری پێگەیەکی تیرۆرستانی داعشییان لە چیای پەلکانە لەڕۆژهەڵاتی پارێزگای سەڵاحەددین کردووەتە ئامانج، لەئاکامدا دوو تیرۆرست کوژران و چەندین کەرەستە و تەقەمەنی سەربازیش دەستی بەسەردا گیراوە. 

 

زانیاریی زیاتر: شانەی ڕاگەیاندنی ئەمنیی عێراق ئاماژەی بەوەشکرد، ئەو حەشارگەیەی کراوەتە ئامانج کەوتووەتە ناو کەرتی فەرماندەیی ئۆپەراسیۆنەکانی ڕۆژهەڵاتی سەڵاحەددین و بەشوێنێکی سەختی سەربازی، وەک پەناگەیەک بەکارهێنراوە.