هیچ هاوپەیمانییەتییەك لە هەرێمی كوردستان بۆ هەڵبژاردن تۆمار نەكرا

ئاڤا نیوز

دەرگای تۆماركردنی حیزب و هاوپەیمانێتیی بۆ هەڵبژاردنی پەرلەمانی عێراق، دادەخرێت و هیچ هاوپەیمانیەتییەك لە هەرێمی كوردستان تۆمار نەكرا.

وێنە گەورەکە: بۆ بەشداریکردن لە هەڵبژاردنی داهاتووی پەرلەمانی عێراق، کۆمیسیۆن دەرگای خۆتۆماركردنی بۆ حیزب و هاوپەیمانییە سیاسییەکان تا ئەمڕۆ پێنجشەممە 22ـی ئایار درێژكردەوە و تا ئێستا 20 هاوپەیمانییەتی و 116 حیزب و لایەنی سیاسی تۆماركراون.

ئەوەی پێویستە بیزانیت: هەریەك لە پارتی و یەكێتی لەسەر پێكهێنانی هاوپەیمانییەتی و لیستی هاوبەش گفتوگۆیان كرد، بەڵام سەركەوتوو نەبوون، هاوكات هەریەك لە ( نەوەی نوێ، كۆمەڵ، یەكگرتوو، هەڵوێست، بەرەی گەل، دكتۆر یوسف) چەندین كۆبوونەوەیان كرد، بەڵام نەیانتوانی بگەنە ڕێككەوتن بۆ پێكهێنانی هاوپەیمانێتی، بەپێی زانیاریی تایبەتی ئاڤا؛ یەكگرتوو و كۆمەڵی دادگەریش بەجیا هەوڵیاندا بە لیستێكی هاوبەش بەشداربن، بەڵام ئەو دووانەش نەگەیشتنە ڕێككەوتن.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند، پێشتر 66 هاوپەیمانی تۆمارکراو لە کۆمیسیۆن هەبوو، لەو ژمارەیەش 18 هاوپەیمانی بۆ ئەم هەڵبژاردنە ناوی خۆیان تۆمارکردووە، ئەنجوومەنی کۆمیسیارانیش مۆڵەتی بە دوو هاوپەیمانی نوێ داوە، هاوکات 13 لیستی تاکە کەسیش تۆمارکراون، لەپاڵ 116 حیزب و لایەنی سیاسی.