ئەنجوومەنی ئاسایشی تورکیا: بە هەستیارییەوە چاودێری هەنگاوەکانی چەکدانانی پەکەکە دەکەین

ئاڤا نیوز

 

ئەنجوومەنی ئاسایشی تورکیا بە سەرۆکایەتیی ڕەجەب تەیب ئەردۆغان، سەرۆککۆماری تورکیا کۆبووەوە و قۆناغی دوای هەڵوەشاندنەوەی پەکەکەی تاوتوێ کرد، لە کۆبوونەوەکەدا جەخت لەوە کرایەوە کە هەنگاوەکانی دوای هەڵوەشاندنەوەی پەکەکە بە هەستیارییەوە چاودێری بکرێت.

 

وێنە گەورەکە: ململانێی نێوان پارتی کرێکارانی کوردستان (پەکەکە) و دەوڵەتی تورکیا، ململانێیەکی لەمێژینەیە، پێشهاتەکانی ئەم دواییە و بانگەوازی پەکەکە بۆ ئاگربەست و دواجار ڕاگەیاندنی چەکدادانی، گۆڕانکارییەکی ئەگەری بەرەو دانوستانەکانی ئاشتی پیشان دەدەن.

 

چیرۆکی سەرەکی: کۆبوونەوەی ئەنجوومەنەکە نزیکەی سێ کاتژمێری خایاندووە، تێیدا پرسی هەڵوەشاندنەوەی پەکەکە و دۆخی سووریا تاوتوێ کراون، لە کۆتایی کۆبوونەوەکەش ڕاگەیێنراوێک  بڵاوکرایەوە.
 

ڕاگەیێنراوی فەرمی: لە ڕاگەیێنراوەکەدا هاتووە: تورکیا بەرەنگاری هەموو جۆرە هێرشێکی گرووپە چەکدارەکانی پەکەکە و داعش لە دەرەوە و ناوەوەی تورکیا دەبێتەوە.

-هەموو ئەو هەنگاوانەی کە بە ئامانجی تورکیایەکی بێ تیرۆر نراوە، بە هەستیارییەوە چاودێری دەکرێت،"تیرۆر لە ڕۆژەڤی تورکیا بە تەواوی دەردەکرێت"، ڕژدین لەسەر ئەوەی گەلەکەمان لە ژێر چەتری برایەتی و بەیەکەوەبوون بەهێزتر لە جاران بپارێزین. 

- پاراستنی ئاسایشی سنووری هاوبەش لەگەڵ هەردوو وڵاتی دراوسێ ئێران و عێراق، کە سەقامگیری وڵاتەکانمان بەیەکەوە بەستراوەتەوە. بۆ ئەميش پەرە بە کاری هاوبەش بدرێت. 

- پشتیوانیکردنی لە پاراستنی سەقامگیری خاکی سووریا، هەروەها سوپاسگوزاری بۆ هەڵگرتنی سزاکانی سەر سووریا کە بەهۆیەوە خەڵکی سووریا زیانیان بەردەکەوت.

لەلایەکی دیکەوە: هەر لە چوارچێوەی کۆبوونەوەکەدا، کۆتایی هێنان بە شەڕی نێوان ئۆکراینا و ڕووسیا و پشتیوانی تورکیا بۆ ئاشتی نێوان ئەو دوو وڵاتە، پرسی غەززە و ڕاگرتنی هێرشەکانی ئیسرائیل بۆ سەر فەلەستینییەکان، بەشێکی دیکەی گفتوگۆی ئەنجوومەنی ئاسایشی تورکیا بووە.