ئەردۆغان: خەمی من بەهێزکردنی تورکیایە نەک دووبارە خۆکاندیدکردنەوەم

ئاڤا نیوز

ڕەجەب تەیب ئەردۆغان، سەرۆککۆماری تورکیا ڕایگەیاند، ئامانجی ئەو لە گۆڕینی دەستوور بۆ دووبارە خۆکاندیدکردنەوە و بوون بە سەرۆک نییە، بەڵکو ئامانجی گۆڕینی دەستوورە لە پێناو بەهێزکردنی تورکیا.

چیرۆکی سەرەکی: سەرۆککۆماری تورکیا لە کاتی گەڕانەوەی لە وڵاتی هەنگاریا، لە کۆنگرەیەکی ڕۆژنامەوانیدا وەڵامی پرسیاری ڕۆژنامەنووسانی دایەوە و لەسەر چەند پرسێکی گرنگ قسەیکرد. 

لێدوانی فەرمی: ئەردۆغان لەمیانەی قسەکانیدا گوتی: ئێمە میراتێکی زۆر گرنگ و گەورەمان بۆ نەوەکانمان جێدێڵین، ئەویش میراتی، "تورکیایەکی بێ تیرۆرە"، سەرکەوتنی پرۆسەی ئاشتی شانازییە بۆ من.
 

- دەم پارتی زیاتر لە 50 پەرلەمانتاری هەیە، چاوەڕێ دەکەین زۆر بەهێزتر لە جاران لە ناو پەرلەمان سیاسەت بکەن. 

- چیتر دەستووری پێشوی کودەتاچییەکان بە کەڵکی تورکیا نایەت، پێویستە دەستوورێکی نوێ بۆ تورکیا بنووسرێتەوە. 

-ئامانج لە گۆڕینی دەستوور، دووبارە خۆکاندیدکردنەوەم نییە، یان دووبارە هەڵبژاردنەوەم وەک سەرۆک، ئامانجی من بەهێزکردن و بەرەوپێشبردنی تورکیایە. 

لەلایەکی دیکەوە: ئەردۆغان ستایشی هەڵوێستی دۆناڵد ترەمپ، سەرۆکی ئەمریکای کرد بەوەی سزاکانی سەر سووریای هەڵگرت، هاوکات گوتی، "لیژنەیەکی هاوبەش لە نێوان ئەمریکا و سووریا و عیراق و تورکیا پێکدێت، بۆ ئەوەی چارەنووسی دەستبەسەرکراوانی داعش لە سووریا دیاری بکرێت".

ئەوەی پێویستە بیزانیت: لە دوای هەڵوەشاندنەوەی پەکەکە و داواکاری کورد لە هەموارکردنەوەی دەستووری نوێی تورکیا، جاریکی دیکە پرسی نووسینەوەی دەستوور بووە بە ڕۆژەڤی تورکیا، ئاکپارتی دەیەوێت دەستووێکی نوێ بنووسرێتەوە کە تێیدا "مافی دووبارە کاندیدکردنەوەی ئەردۆغان تێدا پارێزراو بێت"، دەم پارتی دەیەوێت" مافی هاووڵاتی کورد و "یاسای تیرۆر" لە دەستوور بگۆڕێت.