دۆخی مرۆیی غەززە لە داڕمانی تەواوەتیدایە

ئاڤا نیوز

لە ماوەی 24 کاتژمێری ڕابردوودا، ئیسرائیل لانیکەم 90 فەلەستینیی دیکەی لە کەرتی غەززە کوشتوون.
سەرەڕای هێرشە بەردەوامەکان، سوپای ئیسرائیل لە باکووری غەززە و بە تایبەت لە ناوچەکانی بەیت لاهیا، سەلاتین و سوودانییە، بەردەوامە لە وێرانکردن و تەقاندنەوەی خانووی هاووڵاتیان.

 

چیرۆکی سەرەکی: تا ئیستا ئیسرائیل نزیکەی 53 هەزار فەڵەستینی لە کەرتی غەززە کوشتووە کە زۆربەیان ژن و منداڵن. بەم دواییانە ئیسرائیل هێرشەکانی زیاتر کردوون و جگە لە موشەکبارانکردن لە ڕێگەی هێلێکۆپتەریشەوە دەستڕێژی گولـلە لە دانیشتوانی کەرتی غەززە دەکات و بەم هۆیەشەوە ژمارەی قوربانیان زیاتر بوون. 

ئەوەی پێویستە بیزانیت: هاوکات، لەگەڵ ئەوەدا ئیسرائیل ڕێگەی داوە چەند بارهەڵگرێک خۆراک بچێتە ناو کەرتەکەوە، بەڵام ئیسرائیل بارهەڵگرەکانی لە گەڕەکی سەڵاحەددین لە نزیک دەروازەی دێر بەلح لە ناوەڕاستی غەززە کردوونەتە ئامانج و شەش فەلەستینی کوشتووە، ئەوەش لە کاتێکدا بووە ئەو کەسانە ئەرکیان پاراستنی بارهەڵگرەکان بووە و ژمارەیەکی دیکەشی بریندار کردوون.

ڕاگەیێنراوی فەرمی: ڕێکخراوی تەندرووستی جیهانی هۆشداری دەدات کە بە هۆی بەردەوامیی هێرشە فراوانەکانی ئیسرائیل، وێرانکردنی ژێرخانی کەرتەکە، قووڵبوونەوەی قەیرانی ئاوارەکان و کەمیی ماددەی خۆراکی دۆخی مرۆیی کەرتەکە گەیشتووەتە بەردەم داڕمانی تەواوەتی.