لەسەر داوای شاخەوان عەبدوڵڵا ڕێگەی كفری - سلێمان بەگ نۆژەن دەكرێتەوە

ئاڤا نیوز

لەسەر داوای جێگری سەرۆكی پەرلەمانی عێراق، ڕێگەی نێوان سلێمان بەگ بۆ كفری، نۆژەندەكرێتەوە و دەكرێت بە دووساید، ئەوەش لەكاتێكدا كەسانی دیكە بۆ مەرامی سیاسی و بەرژەوەندی كەسی وەها بڵاوی دەكەنەوە كە نۆژەنكردنەوەی شەقامەكە بە هەوڵی ئەوان بووە. 

 

وێنە گەورەكە: بەگوێرەی نووسراوێكی وەزارەتی ئاوەدانكردنەوە و شارەوانییەكانی حكومەتی فیدڕاڵی، لەسەر داوای د. شاخەوان عەبدوڵڵا، جێگری سەرۆكی پەرلەمانی عێراق، ڕێگەی سلێمان بەگ - كفری، نۆژەن دەكرێتەوە و دەكرێت بە دووساید، بۆ ئەم مەبەستەش تەرخانی دارایی دابین دەكرێت.

 

زانیاریی بەدەستهاتوو: هاوكات بەپێی نووسراوێكی سندووقی بونیادنانەوەی ناوچە زیانلێكەوتووەكان بەهۆی كردە تیرۆرستییەكانەوە، بڕی چوار ملیار و 756 ملیۆن دینار بۆ جێبەجێكردنی پرۆژەكە تەرخان كراوە.

 

لێدوانی فەرمی: لەبارەی وەرگرتنی ڕەزامەندی بۆ جێبەجێكردنی پرۆژەكە، د. شاخەوان عەبدوڵڵا، جێگری سەرۆكی پەرلەمانی عێراق ڕایدەگەیەنێت، "خزمەتكردنی خەڵك ئەركی سەرشانمانە، بەڵام بەداخەوە كاتێك پەرلەمانتارێک یان هەرکەسێک بەناڕەوا خۆی دەکاتە خاوەن پرۆژەیەک کە هیچ ئاگاداری چۆنیەتی جێبەجێكردنی پرۆژەكەش نەبووە، ناچارین ئەو ڕوونكردنەوەیە بدەین."

 

پێدراوە ڕاستییەكان: دوای ئەوەی شاندێك لە دانیشتووانی شارۆچكەی كفری سەردانی نووسینگەی جێگری سەرۆكی پەرلەمانی عێراق دەكەن لە بەغدا، بە مەبەستی گەیاندنی داواكاریی بۆ چاككردنەوەی ڕێگەی نێوان كفری - سلێمان بەگ، ئەوكات شاخەوان عەبدوڵڵا دەستبەجێ نووسراوێك ئاڕاستەی وەزارەتی ئاوەدانكردنەوە و نیشتەجێكردن و شارەوانییەكان دەكات، وەزارەتی ناوبراویش لەسەر بنەمای ئەو داواكارییە ڕەزامەندی جێبەجێكردنی پرۆژەكە دەدات و سندووقی بونیادنانەوەی ناوچە زیانلێكەوتووەكان بەهۆی كردە تیرۆرستییەكانەوە ڕادەسپێرێت بۆ تەرخانكردنی گوژمەی تێچووی پرۆژەكە و جێبەجێكردنی لە نزیكترین كاتدا.