سەرۆکوەزیران مەسرور بارزانی لەگەڵ وەزیری دەرەوەی ئەمریکا کۆدەبێتەوە

ئاڤا نیوز

وەزارەتی دەرەوەی ئەمریکا پشتڕاستی کردەوە کە ئەمڕۆ هەینی مارکۆ ڕۆبیۆ، وەزیری دەرەوەی ئەمریکا، پێشوازی لە سەرۆکوەزیران مەسرور بارزانی دەکات و بابەتە دووقۆڵییەکان و پرسەکانی ئابووری و وزە تاوتوێ دەکرێن.

وێنە گەورەکە: لە میانەی سەردانەکەیدا بۆ واشنتن، سەرۆکوەزیران مەسرور بارزانی، چەندین کۆبوونەوەی لەگەڵ بەرپرسانی باڵای ئەمریکا ئەنجام داوە، ئەمڕۆش لەگەڵ مارکۆ ڕۆبیۆ، وەزیری دەرەوەی ئەو وڵاتە کۆ دەبێتەوە.

ڕاگەیێنراوی فەرمی: بە گوێرەی ڕاگەیێنراوێكی وەزارەتی دەرەوەی ئەمەریکا. کۆبوونەوەکە ئەمڕۆ هەینی کاتژمێر 01:30 بەکاتی واشنتن، 08:30ـی ئێوارە بەکاتی کوردستان دەبێت و لە باڵەخانەی وەزارەتی دەرەوە دەبێت.

زانیاریی زیاتر: بەگوێرەی ڕاگەیێنراوەکە دوای کۆبوونەوەکە، سەرۆکوەزیران مەسرور بارزانی و مارکۆ ڕوبیۆ کۆنگرەیەکی ڕۆژنامەوانیی هاوبەشیان دەبێت.

ئەوەی پێویستە بیزانیت: پێشتر تامی بروس، گوتەبێژی وەزارەتی دەرەوەی ئەمریکا، لە کۆنگرەیەکی ڕۆژنامەنووسیدا ڕاگەیاندبوو لە کۆبوونەوەکەدا بابەتە دووقۆڵییەکان و پرسەکانی ئابووری و وزە تاوتوێ دەکرێن.