پۆلیسی تورکیا دەیان کارمەندی سەربازی و بەرپرسی خۆجێی دەستگیر دەکات

ئاڤا نیوز

کاربەدەستانی دادوەری و ئەمنی تورکیا دەستگیرکردنی دەیان کەسیان لە دوو کەیسی جیادا ڕاگەیاند کە یەکێکیان پەیوەندی بە تۆڕی فەتحوڵڵا گیولەن و ئەوی دیکەیان پەیوەندی بە گەندەڵی دارایی شارەوانی ئیستەنبووڵ هەیە.

چیرۆکی سەرەکی: لە میانەی ئۆپەراسیۆنەکان لە 36 پارێزگا و ناوەندی شاری ئیستەنبووڵ، 56 کارمەندی سەربازی چالاک لە سوپای تورکیا دەستگیرکران بە تۆمەتی پەیوەندییان بە تۆڕی ناسراو بە ڕێکخراوی فێتۆ. 9 پۆلیسیش دەستگیرکراون کە زۆربەیان لە ئیستەنبووڵ بوون لەسەر هەمان کەیس.

زانیاریی بەدەستهاتوو: میدیاکانی تورکیا هەواڵی دەستگیرکردنی لانی کەم 64 کەسی دیکەیان بە تۆمەتی دۆسیەی گەندەڵی لە شارەوانی ئیستەنبووڵ بڵاوکردەوە. کەیسێک کە دوو مانگ لەمەوبەر، ئەکرەم ئیمام ئۆغڵو سەرۆکی شارەوانی پێشووی ئەستەنبووڵی لەسەر دەستگیرکرا. بەگوێرەی ڕۆژنامەی بیرگون، 44 کەس لە هەڵمەتەکانی ڕۆژی هەینی دەستگیرکراون و پۆلیس بەدوای پێنج کەسی دیکەدا دەگەڕێت. جگە لەوەش لە ڕۆژی سێشەممەی ڕابردووەوە 20 کەسی دیکە بە تۆمەتی ڕێکخستنی تەندەری نایاسایی و وەرگرتنی بەرتیل دەستگیرکراون. لە نێو ئەو دەستگیرکراوانەدا سکرتێری تایبەتی ئیمامئۆغڵو و ئەفسەری ئاسایشی تایبەتی و بەرپرسی پەیوەندییە گشتییەکانی شارەوانی ئیستەنبووڵ هەن.