لە سلێمانی سێ داعش دەستگیر دەكرێن

ئاڤا نیوز

دەزگای ئاسایشی هەرێم، دەستگیركردنی 3 تیرۆرستی داعش لە ناوچە جیاوازەكانی پارێزگای سلێمانی ڕادەگەیەنێت.

چیرۆكی سەرەكی: بەڕێوەبەرایەتیی گشتیی ئۆپەراسیۆنەکانی دەزگای ئاسایشی هەرێم، بەهەماهەنگیی ئاڵوگۆڕی زانیاریی لەگەڵ دەزگا ئەمنییەكانی عێراق، 3 تیرۆرستی داعش لەسنووری شاری سلێمانی و شارۆچكەی چەمچەماڵ و شارەزوور، دەستگیر دەكات كە لەماوەی ڕابردوودا ئەندامی چالاكی ڕێكخراوەکە بوون و دەستیان هەبووە لە چەندین كردەی تیرۆرستی تاوانكاری.

ڕاگەیێنراوی فەرمی: دەزگای ئاسایشی هەرێم، لە ڕاگەیێنراوێكدا ئاماژەی بەوە كردووە، لە ماوەی ڕۆژانی 6 تاوەكو 21ـی ئایاری 2025، لە سێ چالاكی جیاوازدا، لەسەر بنەمای زانیاریی هەواڵگری و بەبڕیاری دادوەری لێکۆڵینەوەی ئاسایش، دوای بەدواداچوون و کۆکردنەوەی زانیاریی ورد و دەستنیشانکردنی شوێنی تیرۆریستان، توانرا 3 تیرۆریستی داعش لە دەوروبەریی سلێمانی و چەمچەماڵ و شارەزوور, دەستگیربکرێن کە لەلایەن دادگاکانەوە داواکراو بوون.

زانیاریی زیاتر: تۆمەتباران پاڵپشت بە ماددەی (4)ـی یاسای بەرەنگاربوونەوەی تیرۆر ڕاگیراون و ڕووبەڕووی یاسا کراونەتەوە و لێکۆڵینەوە لە دۆسیەکانیان بەردەوامە.