لە سنووری هەولێر پۆندێكی دیكە لەتەواوبووندایە

ئاڤا نیوز

كارەكانی پرۆژەی پۆندی زیارەت لە سنووری پارێزگای هەولێر 80%ـی تەواو بووە كە گرنگییەكی زۆری بۆ ئاودێریی زەویی كشتوكاڵی ناوچەكە هەیە.

وێنە گەورەكە: لەچوارچێوەی بایەخدانی كابینەی نۆیەمی حكومەتی هەرێمی كوردستان بە پرۆژەكانی ئاودێری لەپێناو سەقامگیركردنی ئاسایشی ئاو، پرۆژەی پۆندی زیارەت بە گوژمەی زیاتر لە 562 ملیۆن دینار دروست دەكرێت كە لەسەر بودجەی بەڕێوەبەرایەتیی ئاودێریی پارێزگای هەولێر، جێبەجێ دەكرێت.

ڕاگەیێنراوی فەرمی: بەگوێرەی ڕاگەیێنراوی دیوانی پارێزگای هەولێر، كاركردن لە پرۆژەكە قۆناغی باشی بڕیوە و 80%ـی كارەكانی تەواوبووە، كە بەشێوەی بەڵێندەرایەتی جێبەجێ دەكرێت.

ئەوەی پێویستە بیزانیت: پێشتر ئومێد خۆشناو، پارێزگاری هەولێر بە ئاڤا میدیای ڕاگەیاند، تا ئێستا 10 پۆندی نوێ لەسنووری پارێزگای هەولێر دروستكراون و كارەكانی دروستكردنی سەرووی 43 پۆندی دیكەش بەردەوامە و لە ئاییندەیەكی نزیكدا تەواو دەكرێن.

بۆچی گرنگە: تەواوکردنی هەر پۆندێک کاریگەری ڕاستەوخۆی دەبێت لەسەر کەرتی کشتوکاڵ و زیادبوونی ئاوی ژێرزەوی لەو سنوورە.