عەباس عێراقچی: دانووستانە ئەتۆمیەکان لەگەڵ واشنتن ئاڵۆزە و پێویستی بە کاتی زیاتر دەبێت

ئاڤا نیوز

وەزیری دەرەوەی ئێران ڕایدەگەیەنێت بەرەوپێشچون لە دانووستانەکانی ئێران و ئەمریکا هەیە، بەڵام گفتوگۆکان لەسەر بەرنامە ئەتۆمیەکان ئاڵۆزە و پێویستی بە لێکتێگەشتنی زیاتر دەبێت.

وێنە گەورەکە: سەرەڕای بەردەوامی کۆبوونەوە و دانووستانەکانی تاران و واشنتن لەسەر بەرنامە ئەتۆمییەکەی ئێران، بەڵام تاوەکو ئێستا هەردوو دەوڵەت لەسەر چەندین پرس ناکۆکن، ئەمریکا چەندین جار دووپاتیکردووەتەوە نابێت ئێران بە هیچ شێوەیەک ببێتە خاوەنی چەکی ئەتۆمی.

چیرۆکی سەرەکی: ئەمڕۆ هەینی، 2025-05-23، گەڕی پێنجەمی دانووستانەکانی نێوان ئێران و ئەمریکا سەبارەت بە پرسی ئەتۆمی، لە ڕۆمای پایتەختی ئیتاڵیا، بەڕێوەچوو.

لێدوانی فەرمی: عەباس عێراقچی، وەزیری دەرەوەی ئێران بە کەناڵی فەرمی ئێرانی ڕاگەیاند، هەرچەندە دانووستاندنە ئەتۆمییەکان لەگەڵ واشنتن ئاڵۆزە، بەڵام بەهۆی ئەو پێشنیازانەی کە لەلایەن عومانەوە پێشكەش دەكرێت ئەگەری بەرەوپێشچوون لە کۆبوونەوەکان هاتووەتە کایەوە و ئێستا شاندی واشنتن روونتر لە داواکارییەکانمان تێدەگات.

لە لایەکی دیکەوە: بەدر بو سەعیدی، وەزیری دەرەوەی عومان ڕایگەیاند: ئەمریکا و ئێران نەگەشتوون بە هیچ ڕێککەوتنێک، بەڵام لە خولی پێنجەمی دانووستانەکان هەندێک بەرەوپێشچوون بەدیدەکرێت.