دیمەشق پێشوازی لە بڕیاری هەڵگرتنی سزاکان دەکات و بە "هەنگاوێکی ئەرێنی" ناوی دەبات

ئاڤا نیوز


حکومەتی سووریا پێشوازی لە بڕیاری هەڵگرتنی سزاکانی سەر وڵاتەکەی لەلایەن حکومەتی ئەمریکاوە دەکات و بە هەنگاوێکی ئەرێنی ناوی دەبات بە ئاڕاستەیەکی دروست بۆ کەمکردنەوەی ئازارە مرۆیی و ئابوورییەکان لە وڵاتدا.

وێنە گەورەکە: هەینی 23ـی ئایاری 2025، وەزارەتی گەنجینە ئەمریکا یەکەم هەنگاوی بۆ هەڵگرتنی سزاکانی سەر سووریا جێبەجێ کرد و بۆ ماوەیەکی کاتی بەشێک لە سزا ئابوورییەکانی سەر ئەو وڵاتەی هەڵگرت.

 

ڕاگەیێنراوی فەرمی: وەزارەتی دەرەوەی سووریا لە ڕاگەیێنراوێکدا جەخت لەوە دەکاتەوە کە سووریا دەستی درێژکردووە بۆ هەموو ئەوانەی ویستیان هاوکاری بکەن، لەسەر بنەمای ڕێزگرتن لە یاساکان و دەستوەرنەدان لە کاروباری ناوخۆیی.

 

- ئێمە بڕوامان وایە کە گفتوگۆ و دیپلۆماسی باشترین ڕێگەیە بۆ دروستکردنی پەیوەندییەکی هاوسەنگ کە بەرژەوەندی گەلان بەدیدەهێنێت و ئاسایشی ناوچەکە بەهێز دەکات.

- هەروەها سووریا سوپاسی هەموو ئەو وڵات و دامەزراوە و گەلانە دەکات کە لەگەڵیان وەستاون لە سەرختییەکاندا.

ئەوەی پێویستە بیزانیت: بەرپرسێکی وەزارەتی دەرەوەی ئەمریکا بە ئاژانسی ڕۆیتەرزی ڕاگەیاندووە، مارکۆ ڕوبیۆ، وەزیری دەرەوەی ئەمریکا بەپێی یاسای قەیسەر بۆ ماوەی 180 ڕۆژ سزاکانی سەر سووریا هەڵدەگرێت، بۆ ئەوەی سزاکان بۆ بوژانەوەی ئەو وڵاتە ڕێگر نەبن.