دانا عەبدولكەریم: دەستكاری بەرنامەكەی نەوشیروان مستەفا ناكەین

 ئاڤا نیوز

 

ئەمڕۆ هەردوو باڵەکەی گۆڕان لە شاری سلێمانی بە هاوبەشی کۆنفڕانسی نیشتمانی بزووتنەوەکە دەبەستن و کار بۆ یەکگرتنەوە دەکەن، بەڵام هێشتا ناکۆکیی نێوانیان لەبارەی دەستووری حیزبەکە بەردەوامە و یەکلا نەبووەتەوە.

 

وێنە گەورەكە: ئەمڕۆ شەممە 24-5-2025، كۆنفڕانسی نیشتمانیی هاوبەشی دوو ئاڕاستە و بەرە جیاوازەكەی گۆڕان لە شاری سلێمانی بەڕێوە دەچێت،کە تەنیا 1200 كەس بۆیان هەیە بەشداریی لە كۆنفرانسەكە بكەن و ئەمڕۆ دوا وادەیە بۆ یەكلاكردنەوەی پرسەكە.

 

لێدوانی فەرمی: دانا عەبدولکەریم، وەزیری ئاوەدانکردنەوەی حکومەتی هەرێمی کوردستان لە پشکی گۆڕان و یەکێکە لە بەرپرسانی باڵی گردی زەرگەتە، لە کۆنفڕانسێکی ڕۆژنامەوانیدا ڕایگەیاند: ئەم کۆنفڕانسە لە قازانجی بزووتنەوەی گۆڕان و بەرنامەکەی نەوشیروان مستەفایە، بەداخەوە هەندێک لەو برادەرانە دەیانەوێت دەستووری بزووتنەوەی گۆڕان بگۆڕن و بەرنامەی نەوشیروان مستەفا بکەن بە بەرنامەیەکی دیکە، ئەوەی گرنگە لای ئێمە پاراستنی بەرنامەکەیەتی، بەدەر لەوە ئێمە هەموومان برای یەکین.

- لەنێو گۆڕان دوو ئاراستە هەیە، ئاراستەیەک ئەوەیە کە پارێزگاری لە دەستووری نەوشیروان مستەفا دەکات، ئاراستەکەی دیکە دەستوورەکەی گۆڕیوە و کردوویەتی بە حیزبێکی شموولی و ستوونی، سەرۆک و مەکتەبی سیاسی بۆ حیزبەکە داناوە، ئەمەش لەگەڵ ناوەڕۆکی گۆڕان یەک ناگرێتەوە.