شاسوار عەبدولواحید: دەستخۆشی لەهەر کەسێک دەکەم کۆمپانیای بیانیی بهێنێتە کوردستان

ئاڤا نیوز

سەرۆکی جوڵانەوەی نەوەی نوێ سەبارەت بە گرێبەستەکانی وەزارەتی سامانە سرووشتییەکان لەگەڵ کۆمپانیا ئەمریکییەکان، دەڵێت، "دەستخۆشی لەهەر کەسێک دەکەم بتوانێت وەبەرهێن بهێنێتە کوردستان."

وێنە گەورەکە: هەردوو گرێبەستی حکومەتی هەرێمی کوردستان لەگەل دوو کۆمپانیای گەورەی ئەمریکا بۆ دەرهێنانی گازی سروشتی بە  بەهای 110 ملیار دۆلار، کاردانەوەی زۆری بەدوای خۆی دا هێنا، گەورەترین جوڵانەوەی ئۆپۆزسیۆن لە کوردستان دەستخۆشی لەم هەنگاوە دەکات بۆ ڕاکێشانی وەبەرهێنەری بیانی بۆ کوردستان.

لێدوانی فەرمی: شاسوار عەبدولواحید، سەرۆکی جوڵانەوەی نەوەی نوێ لە کۆنگرەیەکی ڕۆژنامەوانیدا گوتی، "حەزدەکەم خەڵکی کوردستان ئەمە بە هەستاریی وەرنەگرن، تاوەکو وەبەرهێنەری زیاتر بێنە ئەم وڵاتەوە، قازانجی زۆرترە، ئەو وەبەرهێنانەی لە خاک و وڵاتی خۆمان دەکرێت جێگەی دەستخۆشییە، من بەش بە حاڵی خۆم دەستخۆشی لەم هەنگاوانە دەکەم."

ئەوەی پێویستە بیزانیت: ئەو دوو گرێبەستەی لەنێوان وەزارەتی سامانە سرووشتییەکان و کۆمپانیا ئەمریکییەکان کراون پێکهاتوون لە گرێبەستێک بۆ پەرەپێدانی کێڵگەی تۆپخانە -کوردەمیر لە گەرمیان لەگەڵ کۆمپانیای 'وێسترن زاگرۆس' واژۆ کراوە، کێڵگەکە پێنج ترلیۆن پێ سێجا گازی سروشتی و 900 ملیۆن بەرمیل نەوتی تێدایە بەهای پڕۆژەکە 70 ملیار دۆلارە. گرێبەستی دووەم لەگەڵ کۆمپانیای 'ئێچ کەی ئێن ئینێرجی' بۆ کێڵگەی گازی میرانە لە بازیان، ئەم کێڵگەیە هەشت ترلیۆن پێ سێجا گازی سروشتی تێدایە بەهای پڕۆژەکە 40 ملیار دۆلارە.