هەشت ملیۆن هاووڵاتی سووریا ناویان لە لیستی ڕەشی ڕژێمی ئەسەد بووە

ئاڤا نیوز

بە پێی دواین زانیارییەکانی وەزارەتی ناوخۆی حکومەتی نوێی سووریا یەک لەسەر سێی هاوڵاتییانی سووریا ناویان لە لیستی ڕەشی بەشار ئەسەد بووە و لە لایەن هەواڵگری ئەو وڵاتەوە داواکراو بوون.

وێنە گەورەکە: لە ماوەی 24 ساڵ حوکمی بەشار ئەسەد، سەرۆکی پێشووی سووریا، هاوڵاتیانی ئەو وڵاتە ڕووبەڕووی چەندین قۆناغی سەخت و دژوار بوونەوە لە لایەن کاربەدەستانی حکومەتی بەشار ئەسەدەوە، بە تایبەت لە ساڵانی 2011 بۆ 2024 ماوەی شەڕی گرووپە چەکدارەکان و حکومەتی سوریا بوو، لەو ماوەیەدا زۆرترین کەس دەستگیرکران و کوژران لە لایەن رژێمی بەشار ئەسەدەوە.

لێدوانی فەرمی: نورەدین بابا، وتەبێژی وەزارەتی ناوخۆی حکومەتی سووریا بە میدیاکانی ڕاگەیاند: لە بەردەوامی لێکۆڵینەوەکانمان لەسەر بەڵگەنامەکانی ڕژێـمی پێشوو ئەوەمان بۆ دەرکەوتووە کە زیاد لە " هەشت ملیۆن " کەس لە هاوڵاتیانی سووریا لە لیستی ڕەشی دەزگای هەواڵگری و ئاسایشی ڕژێمی بەشار ئەسەد بوون و هەموویان داواکراوبوون، ئەم ژمارەیە یەکسانە بە یەک لەسەر سێی دانیشتووانی سووریا، ئەمەش بەڵگەیەکی دیکەیە لەسەر دڕندەیی ڕژێمی بەشار ئەسەد.

باکگراوند: خانەوادەی ئەسەد لە ساڵی 1971 دەسەڵاتی سووریایان گرتە دەست، تاوەکو ساڵی 2000 حافز ئەسەد سەرۆکی سووریا بوو، لە ساڵی 2000 دوای مردنی باوکی، بەشار ئەسەد دەسەڵاتی گرتە دەست و لە 2024-12-08، کۆتایی بە دەسەڵاتی خانەوادەی بەشار ئەسەد و حزبی بەعس لە سووریا هێنرا.