نۆ منداڵی  یەک خێزان لە غەززە کوژران

ئاڤا نیوز

لە هێرشێکی ئیسرائیل بۆ خان یونس لە باشووری کەرتی غەززە، نۆ منداڵی یەک خێزان کە دایک و باوکیان پزیشکە، کوژران.

وێنە گەورەکە: سەرەڕای هەوڵەکان بۆ وەستاندنی شەڕ و ڕاگەیاندنی ئاگربەست، بەڵام ئیسرائیل بەردەوامە لە هێرشەکانی بۆ سەر کەرتی غەززە.

لێدوانی فەرمی: مەحمود بەسەل، گوتەبێژی بەرگری شارستانی بە ئاژانسی فرانس پرێسی ڕاگەیاندووە، تیمەکانمان تەرمی نۆ منداڵییان دەرهێنا کە بەشێکیان سووتاون، لە ماڵی دکتۆر حەمدی نەجار و هاوژینەکەی دکتۆر عەلا نەجار کە هەموویان منداڵی یەک خێزان بوون.

دوای نیوەڕۆیی هەینی، فڕۆکەکانی ئیسرائیل ماڵی ئەو پزیشکەیان کردووەتە ئامانج، حەمدی نەجار و کوڕێکی بریندارن،  نۆ منداڵی کوژراون کە دووانیان لە ژێر داروپەردووەکان ماونەتەوە و هێشتا تەرمەکانیان نەدۆزراوەتەوە.

لەلایەکی دیکەوە: دکتۆر مونیر بورش، بەڕێوەبەری گشتیی وەزارەتی تەندروستی لە کەرتی غەززە، لە هەژماری تایبەتی خۆی لە تۆڕی کۆمەڵایەتی ئێکس پشتڕاستی کردەوە کە بۆردومانەکە دوای ماوەیەکی کەم لە دوای ئەوەی حەمدی نەجاڕ هاوسەرەکەی بە ئۆتۆمبێلەکەی دەبردە سەر کارەکەی ڕوویدا.

بەرش دەڵێت: تەنیا چەند خولەکێک دوای گەڕانەوەی، مووشەکێک کەوتە سەر ماڵەکەیان، ئەمە ئەوەیە کە ستافی پزیشکیمان لە کەرتی غەززە تووشی دەبن، "وشەکان بەس نین بۆ وەسفکردنی ئازارەکە". لە غەززە نەک هەر کارمەندانی پزیشکی دەکرێنە ئامانج، بەڵکو تەواوی خێزانەکان دەکرێنە ئامانج.