ئەمساڵ لە هەرێمی کوردستان زیاتر لە 700 ڕووداوی ئاگرکەوتنەوە تۆمارکراون

ئاڤا نیوز

لە سەرەتای ئەمساڵەوە تاوەکو ئێستا نزیکەی 700 ڕووداوی ئاگرکەوتنەوە لە هەرێمی کوردستان تۆمارکراوە و نزیک بە نیوەی ڕووداوەکانیش لە دوو هەفتەی ڕابردوودا و لە دوای بەرزبوونەوەی پلەکانی گەرما، ڕوویانداوە.

 

وێنە گەورەکە: ساڵانە لەگەڵ هاتنی وەرزی گەرما و دروێنەکردنی گەنم و جۆ, ڕووداوەکانی ئاگرکەوتنەوەش زیاد دەکات، ئەمساڵ بەهۆی وشکی دەشتودەر و کەمی بارانبارین چاوەرێ دەکرێت ڕووداوەکانی ئاگرکەوتنەوە زیاتربن.

 

ئامارە فەرمییەکان: بەپێی ئامارەکان ڕووداوەکانی ئاگرکەوتنەوە کە لە بەڕێوەبەرایەتییەکانی بەرگریی شارستانیی پارێزگا و شار و شارۆچکەکان وەرگیراون، ڕووداوەکان بەم جۆرەبوون:

 

- لە هەولێر، لە سەرەتای ئەم ساڵەوە تاوەکو ئێستا 440 ڕووداوی ئاگرکەوتنەوە هەبووە، تەنیا لە 24 ڕۆژی ڕابردووشدا 84 ڕووداویان ڕوویداوە، دوایین ڕووداویشیان ئاگرەکەی دووشەوی ڕابردووی ناحیەی شەمامک بوو کە هەزاران دۆنم زەوی داچێنراو بە گەنمی جووتیاران سووتا و زیانی ماددی زۆری لێکەوتەوە.

- لە دهۆکیش 45 ڕووداوی ئاگرکەوتنەوە تۆمارکراوە.
- لە هەڵەبجە لە پێنج مانگی ئەمساڵدا 60 ڕووداوی ئاگرکەوتنەوە هەبووە، تەنیا لە مانگی ڕابردوودا 20 ڕووداویان تۆمارکراوە.
- لە ئیدارەی سەربەخۆی ڕاپەڕین، لە 10 ڕۆژی ڕابردوودا 10 ڕووداوی ئاگرکەوتنەوە هەبووە.
- لە ئیدارەی سەربەخۆی سۆرانیش، لە 10 ڕۆژی ڕابردوودا پێنج ڕووداوی ئاگرکەوتنەوە تۆمارکراوە.
- هەرچی ئیدارەی سەربەخۆی زاخۆیە، تەنیا لەم مانگەدا 51 حالەتی ئاگرکەوتنە هەبووە.
- لە ئاکرێش لە ماوەی 20 ڕۆژی ڕابردوودا 81 ڕووداوی ئاگرکەوتنەوە تۆمارکراوە.

 

زانیاریی زیاتر: پەیوەست بە ڕووداوەکانی ئاگرکەوتنەوە لە سلێمانی، بەڕێوەبەرایەتیی بەرگریی شارستانی سلێمانی هیچ ئامارێکی لەبەردەست نەبوو بەو هۆیەی لەو بەڕێوەبەرایەتییە ئامارەکان شەش مانگ جارێک کۆدەکرێنەوە.