سەدان خانەنشین بۆ ڕایکردنی مامەڵەکانیان لەبەردەم بانکەکانی سلێمانی کۆبوونەتەوە

ئاڤا نیوز

 

سەدان خانەنشین لەبەردەم بانکەکانی سلێمانی کۆبوونەتەوە و ئاڤا میدیا دوایین هەوڵی بانکەکان بۆ ڕاییکردنی مامەڵەی خانەنشینان لەو سنوورە ئاشکرا دەکات.

 

چیرۆکی سەرەکی: بۆ ڕاییکردنی مامەڵەی خانەنشینان، ژمارەیەکی زۆری خانەنشینان سەردانی بانکەکانی سلێمانیان کردووە، ئەمەش قەرەباڵغییەکی زۆری لە بەردەم بانکەکان دروست کردووە، خانەنشینان چەند کاتژمێرێک لەبەردەم بانکەکان دەوەستن، بەهۆی پاڵاپەستۆ و سەرەگرتنی بەردەم بانکێکیش، تەندروستی خانەنشینێک تێکدەچێت و دەبوورێتەوە.

 

زانیاریی پەیامنێر: چۆمان مەحموود، پەیامنێری ئاڤا ڕایگەیاند: ئەو کێشەیە لە بانکەکانی مەڵکەندی 2، مەڵکەندی 6، باخان، کوردسات، تووی مەلیک و مەجی بەگ لە سلێمانی دروست بووە.

 

ئەوەی پێویستە بیزانیت: سەدان خانەنشین لە گوند و ناوچەکان سەردانی بانکە بازرگانیەکانیان کردووە، بەشێکیان چەند ڕۆژێکە نۆرەیان گرتووە و ناتوانن مامەڵەکانی تایبەت بە خانەنشینی تەواو بکەن، ئەمەش نیگەرانیی خانەنشینانی لێکەوتەوە.

 

زانیاریی بەدەستهاتوو: ئاڤا میدیا لە سەرچاوەیەکی ئاگەدارەوە زانیویەتی، بانکەکان لیژنەکانیان بۆ ڕاییکردنی مامەڵەکانی تایبەت بە خانەنشینان فراوانتر دەکەن و هەوڵ دەدەن بە شێوەیەکی خێراتر کارەکانیان تەواو بکرێن.