دوایین زانیاریی لەبارەی گەڕان بەدوای ئاڤێستا و بڵاوبوونەوەی گرتە ڤیدیۆیەک لە سۆشیاڵ میدیا

ئاڤا نیوز

ماوەی 51 ڕۆژە گەڕان بە دوای تەرمی ئاڤێستا بەردەوامە و تاوەکو ئێستا نەدۆزراوەتەوە، هەروەها بەرگریی شارستانی سۆران لەڕێگەی ئاڤا میدیاوە ڕوونکردنەوە لەبارەی بڵاوبوونەوەی گرتە ڤیدیۆیەک دەدات.

چیرۆکی سەرەکی: ڕۆژی شەممە 2025-04-05، خێزانی ئاڤێستا بۆ گەشت و سەیران چوونەتە سنووری قەزای مێرگەسۆر، لەو کاتەدا ئاڤێستا لەگەڵ براکەی بۆ وێنەگرتن چوونەتە لێواری ڕووباری تەنگاتوور، کوڕەکە دەکەوێتە نێو ئاو و ئاڤێستای خوشکی هەوڵی رزگارکردنی دەدات، بەڵام ئاڤێستای تەمەن 27 ساڵ دەکەوێتە نێو ڕووبارەكە و ماوەی 51 ڕۆژە تەرمەکەی نەدۆزراوەتەوە.

لێدوانی فەرمی: ڕەوەند هاودیانی، وتەبێژی بەرگریی شارستانی سۆران بە ئاڤای ڕاگەیاند: چەند تیمێکی تایبەت کە ژمارەیان نزیکەی 15 کارمەند دەبێت، لە هەوڵەکانیان بۆ دۆزینەوەی ئاڤێستا بەردەوامن و ئەو تیمانەی لەوێ ماونەتەوە، ئەرکیان چوونەژێر ئاو و پشکنینی شوێنە ئاستەنگەکانە، هەروەها تیمێک یاوەری براکەی ئاڤێستا دەکات کە لەڕێگەی ئامێرێکەوە خەریکی گەڕانە بە ژێر ئاوەکەدا.

زانیاریی زیاتر: لەبارەی بڵاوبوونەوەی گرتە ڤیدیۆیەک کە چەند کارمەندێکی بەرگریی شارستانی تەرمێک دەدۆزنەوە، ڕەوەند هاودیانی گوتی: ئەو تەرمە هی ئاژەڵێک بووە و لەکاتی پشکنینەکاندا دۆزراوتەوە، مەبەست لە بڵاوکردنەوەی گرتە ڤیدیۆیەکەش نیشاندانی پەنگخواردنەوەی تەرم و ئاوسانییەتی لە نێو ئاودا.

لەلایەکی دیکەوە: فەخرەدین بەرزنجی، مامی ئاڤێستا بە ئاڤا میدیای گوت: "هەوڵەکان بۆ دۆزینەوەی تەرمی ئاڤێستا بەردەوامن، ئێمەش تەنیا چاوەڕێی ڕەحمی خودا دەکەین، چونکە تەواوی ئەو ڕیگایانەی بۆ دۆزینەوەی تەرم بەکار دەهێنرێن، گیراونەتە بەر و هەوڵەکان بەرز دەنرخێنین".

گۆشەیەکی دیکەی دیمەنەکە: "مامی ئاڤێستا سوپاسی ئاڤا میدیای کرد کە بەردەوام بەدواداچوون لەسەر پرسی ئاڤێستا دەکات و زانیارییەکان وەک خۆی بە هاونیشتمانیان دەگەیێنێت، هەروەها گوتی: ئاڤا بووەتە سەرچاوەیەکی گرنگ و پێویست بۆ هاووڵاتیان".