دوو تۆمەتباری فرۆشتنی هیدفۆنی گزیكردن دەستگیر دەكرێن

ئاڤا نیوز

لە سلێمانی دوو تۆمەتبار دەستگیر دەكرێن كە بەنیازی فرۆشتن و ساغكردنەوەی بیستۆك (سەماعە)ـی گزیكردنی تاقیکردنەوەکانی پۆلی 12ـی ئامادەیی بوونە.

وێنە گەورەکە: ڕۆژی یەكی حوزەیران، تاقیكردنەوەی ئەمساڵی پۆلی 12ـی ئامادەیی دەستپێدەكات، بۆ ڕێگری لە گزیكردنی تاقیكردنەوەكانیش، وەزارەتی پەروەردە چەند ڕێكارێكی تووند پەیڕەو دەكات، ئامێری پەکخەر، پشکنینی پێشوەختە، ڕاگرتنی ئینتەرنێت سێ لەو ڕێكارانەن و بەرپرسانی وەزارەتەكەش دەڵێن ئەنجامی باشی دەبێت.

چیرۆكی سەرەكی: بەڕێوەبەرایەتیی ئاسایشی پارێزگای سلێمانی، پاڵپشت بە بڕیاری دادوەری لێكۆڵینەوەی ئاسایش، ماوەی هەفتەیەكە سەرقاڵی بەدواداچوون و كۆكردنەوەی زانیارییە سەبارەت بە هەوڵێكی فرۆشتنی بیستۆک (سەماعە)ـی گزیكردن (قۆپیەكردن) لەڕێگەی فرۆشتنی ئۆنلاینەوە، دوای كۆكردنەوەی بەڵگەی پێویست، توانرا هەوڵەكان شكست پێبهێندرێت و تۆمەتبارانیش دەستگیر بكرێن كە بەنیازبوون ئامێرەكان ساغبكەنەوە.

ڕاگەیێنراوی فەرمی: دەزگای ئاسایشی هەرێمی كوردستان لە ڕاگەیێنراوێكدا ئاماژەی بەوە كردووە، بەهەماهەنگی لەگەڵ وەزارەتی پەروەردەی حکومەتی هەرێمی كوردستان، ڕێگری دەكات لە هەر هەوڵێكی مامەڵەكردن بە ئامێرەكانی قۆپیەكردن و دزەپێكردنی پرسیارەكانی ئەزموونەكان، ئەمەش لەپێناو فەراهەمكردنی كەشێكی ئارام بۆ بەڕێوەچوونی پڕۆسەی تاقیكردنەوەكان.

زانیاریی زیاتر: ئێستا تۆمەتباران بەپێی ماددەی 240 لە یاسای سزادانی عێراقی دەستگیرکراون و لێکۆڵینەوە لەدۆسیەکانیان بەردەوامە.

لەلایەكی دیكەوە: ئالان حەمە سەعید، وەزیری پەروەردە، لە چەند ڕۆژی ڕابردوودا لە كۆنفڕانسێكی ڕۆژنامەوانیدا ڕایگەیاند: هیوادارم هیچ قوتابییەك فریو نەخوات بە باندەكانی گزیكردن، چونكە چارەنووسی هەموویان ڕووبەڕووكردنەوەی یاسایە.