سەرۆکی دەزگا ئەمنییەکانی 12 پارێزگا لە سووریا جگە لە ناوچە کوردییەکان دادەمەزرێن

ئاڤا نیوز

وەزارەتی ناوخۆی سووریا، سەرۆکی دەزگا ئەمنییەکان لە 12 پارێزگا دادەمەزرێنێت، بەڵام دامەزراندنەکە ناوچە کوردییەکانی نەگرتەوە، ئەمەش وەک هەنگاوێکە لە گۆرانکارییەکانی حکومەتی ڕاگوزەری سووریا بۆ دووبارە ڕێکخستنەوەی دەزگا ئەمنیی و سەربازییەکانی.

چیرۆکی سەرەکی: وەزارەتی ناوخۆی سووریا، وێنەی 12 فەرماندەی سەربازی بە پلەی سەربازی جیاواز لە پلاتفۆڕمەکانی سۆشیال میدیا بڵاوکردەوە و ڕایگەیاند، 12سەرۆکی دەزگا ئەمنییەکان بۆ ناوخۆی سووریا دامەزراندووە.

زانیاریی زیاتر: وەزارەتی ناوخۆی سووریا هیچ زانیارییەکی دەربارەی ئەو فەرماندانە بڵاونەکردوەتەوە، بەڵام چەند کەسێکی تێدایە کە پێشووتر لە ڕیزەکانی تەحریر ولشام بوونە و لە هێرشەکەی ئیدلیب بەشداربوونە.

گۆشەیەکی دیکەی دیمەنەکە: دەستبەکاربوونەکان پارێزگاری حەسەکە و ڕەقە یان نەگرتەوە، کە دەکەونە ناوچەکانی ئیدارەی خۆسەری کورد، کە تا ئێستا دیمەشق لەگەڵیان نەگەیشتووەتە ڕێککەوتنی کۆتایی سەبارەت بە ئایندەی ناوچەکانی ژێر دەسەڵاتی.

لەلایەکی دیکەوە: لە ڕاگەیێنراویکی دیکەدا، وەزارەتەکە دیاریکردنی شەش یاریدەدەری وەزیری ناوخۆی ڕاگەیاند کە کاروباری ئەمنی و مەدەنی و کارگێڕی بەڕێوەدەبەن. ئەم هەنگاوە ئاماژەیە بۆ هەوڵەکانی دەسەڵات بۆ چەسپاندنی پێکهاتەی ئیداری و ئەمنی خۆیان.