وێنەیەکی بارزانیی نەمر لە واشنتن سەرنجی سەرۆکوەزیران مەسرور بارزانی ڕادەکێشیت

ئاڤا نیوز

لە گەشتەکەی بۆ واشنتنی پایتەختی ئەمریکا، لە پاڵ کۆبوونەوە و دیدارەکاندا وێنەیەکی بارزانیی نەمر سەرنجی سەرۆکوەزیران ڕادەکێشێت.

وێنە گەورەکە: لە میانەی سەردانەکەیدا بۆ واشنتن، سەرۆکوەزیران مەسرور بارزانی لە ماوەی هەفتەیەکدا لەگەڵ وەزیر، کۆنگرێسمان، سیناتۆرەکانی وڵاتەکە کۆبووەوە و ئیدارەی دۆناڵد ترەمپ پشتیوانیی خۆی بۆ کوردستانێکی بەهێز و سەقامگیر دەربڕی.

چیرۆکی سەرەکی: ڕۆژی سێشەممە 2025-05-20، سەرۆکوەزیران مەسرور بارزانی لەگەڵ ئەبراهام حەمادە، کۆنگرێسمانی ئەمریکی لە واشنتن کۆبوویەوە، لەو کاتەدا ئەبراهام حەمادە بە وێنەیەکی بارزانیی نەمر سەرنجی سەرۆکوەزیران ڕادەکێشێت.

لێدوانی فەرمی: سابر دری، کە وێنەگری سەرۆکوەزیران مەسرور بارزانییە و وێنەکەی چرکاندووە، بە ئاڤای ڕاگەیاند: ئەبراهام حەمادە داوای لە ستافەکەی کردووە بڕۆنە ژوورە تایبەتەکەی، وێنەیەکی هەڵواسراوی بارزانیی نەمر بهێنن و نیشانی سەرۆکوەزیران مەسرور بارزانیی بدەن.

ئەوەی پێویستە بیزانیت: لەوکاتەدا سکرتێری ئەبراهام حەمادە وێنەکەی بارزانیی نەمر دەهێنێت و دەیداتە دەستی مەسرور بارزانی، سەرۆکوەزیران دڵخۆش دەبێت بەوەی وێنەی بارزانیی نەمر لە ژووری کۆنگرێسمان و کەسایەتییەکی دیار و بەهێزی ئەمریکا دەبینرێت، وەک لە وێنەکەی سەرۆکوەزیراندا دیارە کە چۆن ئەو کارەی حەمادە بە تەواوی سەرنجی ڕاکێشاوە و دڵخۆشە پێی.

گۆشەیەکی دیکەی دیمەنەکە: لە ژوورەکەی ئەو گۆنگرێسمانەی ئەمریکا، جگە لە وێنەی بارزانیی نەمر، وێنەی سەرۆک بارزانی و ئاڵای کوردستانیش هەیە.