لە هەولێر 70 بەندکراو سەردانکردنی کەسوکاریان لێ قەدەغە دەکرێت

ئاڤا نیوز

لە چاکسازیی گەورانی هەولێر 70 بەندکراو سەردانکردنی کەسوکاریان لێ قەدەغە کراوە. بەرپرسێکی چاکسازییەکەش بە ئاڤای ڕاگەیاندووە، هەوڵ دەدەن بۆ پێش جەژن ڕێگە بە خێزانی ئەو بەندکراوانە بدرێت کە سەردانیان بکەن.

وێنە گەورەکە: کەسوکاری 70 بەندکراو لە چاکسازیی گەورانی هەولێر لەڕێگەی ئاڤاوە داوا لە وەزارەتی کاروباری کۆمەڵایەتیی دەکەن، ڕیگەیان پێ بدرێت سەردانی بەندکراوەکانیان بکەن، لەوبارەیەوە ئاڤا میدیا دەنگیان دەگەیێنێتە لایەنی پەیوەندیدار.

ئەوەی پێویستە بیزانیت: ئەو بەندکراوانە بە ماددەی بەکارهێنانی ماددەی هۆشبەر و بازرگانیکردن پێوەی زیندانیکراون، بەشێکیان حوکمی یاساییان تەواو کردووە کەچی کەسوکاریان ناتوانن سەردانیان بکەن، هەروەها بەشێکیان حوکمەکانیان لە دادگە یەکڵایی نەبووەتەوە.

زانیاریی پەیامنێر: ڕزگار کۆچەر، پەیوەندیی بە چاکسازیی گەورانی هەولێرەوە کردووە و پێیان ڕاگەیاندووە: هەموو کار ئاسانییەک بۆ ئەوە دەکەین بەر لە جەژن ڕێگە بە خێزانی ئەو بەندکراوانە بدرێت سەردانیان بکەن و لە نزیکەوە بیانبینن.