کۆمیسیۆنێک بۆ سەرکەوتنی پرۆسەی ئاشتی لە پەرلەمانی تورکیا دروست دەکرێت

ئاڤا نیوز

شاندێکی دەم پارتی سەردانی دەوڵەت باغچەلی کرد و لەسەر پرسی ئاشتی لە تورکیا کۆبوونەوە. لە کۆبوونەوەکەدا بڕیار درا بە دروستکردنی کۆمیسیۆنێک لە پەرلەمانی تورکیا بۆ سەرکەوتنی پرۆسەکە.

وێنە گەورەکە: لەچوارچێوەی لێکەوتەکانی بانگەوازی عەبدوڵا ئۆجەلان و بڕیاری خۆهەڵوەشاندنەوەی پەکەکە، کۆبوونەوەی شاندی دەم پارتی لەگەڵ پارتە سیاسییەکانی تورکیا بەردوامی هەیە و هەموو لایەنەکان جەخت لەسەر جێبەجێکردنی هەنگاو و بڕیارەکان دەکەن بۆ سەرخستنی پرسی ئاشتی لە تورکیا، ئەمڕۆ شاندی دەم پارتی سەردانی دەوڵەت باغچەلی، سەرۆکی مەهەپەیان کرد و بۆ ماوەی 40 خولەک کۆبوونەوەیەکیان ئەنجامدا.

بڵاوکراوەی فەرمی: دەم پارتی دوای کۆبوونەوەی لەگەڵ سەرۆکی مەهەپە لە پەرلەمانی تورکیا، بەیاننامەیەکی فەرمییان بڵاوکردەوە و کۆبوونەوەکەیان بە ئەرێنی ناوبرد و ڕایگەیاند: هەڵسەنگاندن بۆ ڕووداوەکانی دوای "بانگەوازی ئاشتیی و کۆمەڵگەی دیموکراسی" ئۆجەلان، قۆناغەکانی پرۆسەی ئاشتی، کۆتا دیداری ئیمراڵی و بڕیارەکانی کۆنگرەی پەکەکە کراوە.

- هەنگاوەكان بۆ دروستكردنی كۆمیسیۆنێك لە پەرلەمانی توركیا و بە بەشداری سەرجەم پارتە سیاسییەکان لە پێناو پرسی ئاشتی و چارەسەرکردنی بەربەستەکانی بەردەم پرسەکە بڕیاری لەسەر دراوە و كەوتە بواری جێبەجێكردنەوە.

- بڕیاروایە بۆ گفتوگۆکردن لەسەر پرسی دروستكردنی كۆمسیۆنی سەرکەوتنی پرۆسەی ئاشتی، شاندی دەم پارتی لە پەرلەمانی توركیا لەگەڵ شاندی پارتی داد و گەشەپێدانی دەسەڵاتدار كۆببنەوە.