وەزیری بەرگریی سووریا: ڕێگە بە هیچ هێزێک لە دەرەوەی دەسەڵاتی وەزارەتی بەرگری نادەین

ئاڤا نیوز

وەزیری بەرگریی سووریا ڕایدەگەیێنێت، ڕێگە بە هیچ  هێزێک لە دەرەوەی دەسەڵاتی وەزارەتی بەرگری نادەین و ئاماژە بۆ ئەوەش دەکات ئەو مۆڵەتە 10 ڕۆژییەی داویانەتە گرووپە چەکدارەکان لە پارێزگاکان، هێزەکانی سووریای دیموکرات ناگرێتەوە.

وێنە گەورەکە: بەگوێرەی ڕێککەوتنی نێوان حکومەتی سووریا و فەرماندەی گشتی هێزەکانی سووریا، هەسەدە دەبێتە بەشێک لە وەزارەتی بەرگریی سووریا.

لێدوانی فەرمی: مورهەف ئەبو قەسرە، وەزیری بەرگریی سووریا بە ئاژانسی هەواڵی سووریای ڕاگەیاند: لە مانگەکانی ڕابردوودا کۆبوونەوەمان لەگەڵ 130 یەکەی سەربازی و گرووپی چەکداری ئەنجام داوە، دیدگای وەزارەتی بەرگری و ئەو پێکهاتەیەی لەسەری دادەمەزرێت ڕوونکردووەتەوە.

لەلایەکی دیکە: لەبارەی ئەو مۆڵەتە 10 ڕۆژییەی بە گرووپە چەکدارە بچووکەکان لە پارێزگاکان دراوە بۆ ئەوەی سەردانی وەزارەتی بەرگری بکەن بە مەبەستی یەکخستنیان لە چوارچێوەی وەزارەتی بەرگری، مورهەف ئەبو قەسرە گوتی: ئەو مۆڵەتە ناوچەکانی باکووری ڕۆژهەڵاتی سووریا ناگرێتەوە.

هۆکارە زانراوەکان: بە گوتەی مورهەف ئەبو قەسرە، ئەو دۆسیەیە ڕێککەوتنێکی جیای لەسەر کراوە و وەزارەتی بەرگریش بەپێی ئاراستەی گشتی بەردەوام دەبێت لەسەری.

ئەوەی پێویستە بیزانیت: ڕۆژی 10-3-2025، ئەحمەد شەرع،  سەرۆكکۆماری سووریا و مەزڵووم عەبدی، فەرماندەی گشتیی هێزەكانی سووریای دیموكرات (هەسەدە) ڕێککەوتنێکی مێژووییان واژۆکرد، بەگوێرەی ڕێککەوتنەکەش هەسەدە دەبێتە بەشێک لە وەزارەتی بەرگریی سووریا و دەوڵەتی سووریاش مافەکانی کورد گەرەنتی دەکات.