سەرۆکوەزیرانی پێشووتری ئیسرائیل: سوپا لە غەززە خەریکی ئەنجامدانی تاوانی جەنگە

ئاڤا نیوز

ئیهود ئۆڵمێرت، سەرۆکوەزیرانی پێشووی ئیسرائیل، ڕەخنەی لە هێرش و ئۆپەراسیۆنەکانی سوپای ئیسرائیل لە کەرتی غەززە گرت و ڕایگەیاند، ئەوەی لەوێ دەکرێت تاوانی جەنگییە.

بڵاوکراوەی فەرمی: ئۆڵمێرت کە لە 2006 تا 2009 سەرۆکوەزیرانی ئیسرائیل بووە، لە وتارێکیدا نووسیویەتی: باندێکی مافیایی تاوانکار کە لەلایەن بنیامین نەتانیاهۆوە سەرۆکایەتی دەکرێن سەرقاڵی جەنگێکن کە لە مێژووی ئیسرائیلدا وێنەی نەبووە، هەزاران فەلەستینیی بێتاوان و سەربازی ئیسرائیلی لە جەنگەکە کوژراون.

- حکومەت سەرقاڵی جەنگێکی بێ ئامانجە کە هیچ پلانێکی ڕوون و هیچ دەرفەتێکی سەرکەوتنی نییە.

- لەم هەفتانەی دواییدا لە کەرتی غەززە کاری دڕندانە ئەنجام دراون و هیچ ئامانجێکی ڕەوایان نییە.

- ئەم شەڕە ئێستا شەڕێکی سیاسیی تایبەتە کە دەیەوێت غەززە بکاتە ناوچەیەکی قەیرانی مرۆیی.

- ئەوەی ئێمە ئێستا لە غەززە دەیکەین شەڕی وێرانکارییە، جیاکاری ناکات لە نێوان خەڵک، سنوور ناناسێت، دڵڕەقانە و تاوانکارانە خەڵکی سڤیل دەکوژێت، ئەمەش بەرهەمی سیاسەتی حکومەتە کە بە ئاگاییەوە، بە شەڕەنگێزییەوە، بە نیازپیسییەوە، نابەرپرسیارانە ئەنجامی دەدات.

- بەڵێ، ئیسرائیل تاوانی جەنگیی ئەنجام دەدات.

ئەوەی پێویستە بیزانیت: شەڕی نێوان ئیسرائیل و حەماس لە مانگی ئۆکتۆبەری ساڵی 2023 دەستیپێکرد، ئەویش دوای ئەوەی بزووتنەوەی حەماس لە 7ی ئۆکتۆبەری هەمان ساڵ هێرشی کردە سەر ئیسرائیل  و چەند هاووڵاتییەکی ئیسرائیلی بە بارمتە دەستگیر کرد.