ڕووسیا هەڕەشەی جەنگی سێیەمی جیهان لە ئەمریکا دەکات

ئاڤا نیوز

جێگری سەرۆکی ئەنجومەنی ئاسایشی نیشتیمانی ڕووسیا وەڵامی لێدوانەکانی دۆناڵد ترەمپ دەداتەوە و هەڕەشەی هەڵگیرسانی جەنگی سێیەمی جیهانی دەکات.

وێنە گەورەکە: بە هەوڵدان بۆ کوشتنی ڤلادیمێر پووتین، سەرۆکی ڕووسیا لە ڕێگەی هێرشی فڕۆکەی بێ فڕۆکەوانی ئۆکراینی بۆ سەر هەلیکۆپتەری پووتین لە هەرێمی کورسک، هەموو هەوڵەکانی دۆناڵد ترەمپ، سەرۆکی ئەمریکای بۆ ڕێککەوتنامەی ئاشتی و کۆتایهێنان بە جەنگ بەفیڕۆ دەچن، چونکە ڕووسیا لە ماوەی چەند ڕۆژی ڕابردوودا بە شێوەیەکی جیاواز لە ماوەی سێ ساڵی جەنگ هێرشی بۆ سەر کیێڤ و ئۆکراینا دەستپێکردووە، دۆناڵد ترەمپ لە بەرامبەر ئەم وەڵامەی ڕووسیا پووتینی بە شێت ناوبرد و ڕایگەیاند " پووتین یاری بە ئاگر دەکات."

لێدوانی فەرمی: دیمیتری مێدڤیدیڤ، سەرۆکی پێشووی ڕووسیا و جێگری سەرۆکی ئەنجومەنی ئاسایشی نیشتمانی ڕووسیا لە ئەکاونتی خۆی لە پلاتفۆرمی ئێکس وەڵامی دۆناڵد ترەمپی دایەوە و نوسیویەتی: پەیوەست بە وتەکانی ترەمپ سەبارەت بە پووتین کە دەڵێت، یاری بە ئاگر دەکات و  ڕووداوی زۆر خراپ  بۆ ڕووسیا دێتە پێش، من تەنها یەک شتی زۆر خراپ دەزانم، ئەویش جەنگی سێیەمی جیهانییە. هیوادارم ترەمپ لەم قسەیەم تێبگات.

ئەوەی پێویستە بیزانیت: دۆناڵد ترەمپ، پێشتر لە پلاتفۆرمی تروس سۆشیال ڕایگەیاند: ئەوەی پووتین نایزانێت ئەوەیە، ئەگەر من نەبوومایە شتی زۆر خراپ بۆ ڕووسیا ڕوویدەدا، مەبەستم لەم قسەیەم ئەوەیە کە پووتین یاری بە ئاگر دەکات.

لەلایەکی دیکەوە: ڤۆلۆدیمێر زێلینسکی، سەرۆکی ئۆکراینا بۆ گفتوگۆکردن لەبارەی ڕاگەیاندنی ئاگربەست داوای کۆبوونەوەی خێرای لەگەڵ هەردوو سەرۆکی ڕووسیا و ئەمریکا کردووە.