مەرجەکانی پووتین بۆ کۆتاییهێان بە شەڕی ئۆکراینا ئاشکرا دەکرێن

ئاڤا نیوز

چەند سەرچاوەیەکی نزیک لە سەرۆکی ڕووسیا چەند مەرجێکی بۆ ڕاگرتنی شەر و ڕاگەیاندنی ئاگربەست ئاشکرا دەکەن.

وێنە گەورەکە: زۆربەی وڵاتانی دونیا لە سەرووی هەموویانەوە ئەمریکا، لە هەوڵەکانیان بەردەوامن بۆ ڕاگرتنی شەڕی نێوان ڕووسیا و ئۆکراینا، تائێستا ڕووسیا ڕازی نەبووە بە ڕاگەیاندنی ئاگربەست و کۆتایی هێنان بە شەڕ.

زانیاری بەدەستهاتوو: ئاژانسی ڕۆیتەرز لە چەند بەرپرسێکی نزیک لە ڤلادیمێر پووتین مەرجەکانی ئەویان بۆ ڕاگرتنی شەڕی ئۆکراینا ئاشکرا کرد، کە  بڕیارە مۆسکۆ لەم چەند ڕۆژەی داهاتوودا بە یاداشتێک پێشکەش بە کیێڤی بکات.

ئەوەی لەوبارەیەوە دەگوترێت: پووتین دوو مەرجی سەرەکی هەیە بۆ ڕاگرتنی هێرشەکانی بۆ سەر ئۆکراینا کە ئەمانەن:

٠ یەکەم مەرجی پووتین ئەوەیە کە دەبێت سەرکردەکانی ڕۆژئاوا فراوانبوونی ناتۆ بەرەو ڕۆژهەڵات ڕابگرن مەبەستیش لێی ڕێگیرکردنی، ئۆکراینا و  جۆرجیا، مۆڵدۆڤا و کۆمارەکانی دیکەی سۆڤیەتی پێشووە بۆ هاتنە ناو ناتۆ.

٠ هەڵگرتنی بەشێکی بەرچاوی سزاکانی سەر وڵاتەکەی کە لەلایەن یەکێتیی ئەوروپا و ئەمریکا بەسەری دا سەپێنراون.

لەلایەکی دیکەوە: ڤۆلۆدیمێر زێلێنسکی، سەرۆکی ئۆکراینا ڕایگەیاند: ''بانگهێشتنەکردنی ئۆکراینا بۆناو ناتۆ، سەرکەوتنە بۆ پووتین''.

ئەمەش بزانە: بە گوێرەی ڕۆیتەرز، لە ئەگەری قەبووڵ نەکردنی مەرجەکانی پووتین، ناوبراو هەوڵ دەدات لە ڕێگەی فراوانکردنی ئۆپەراسیۆنە سەربازییەکانی نیشانی وڵاتان بدات کە ڕاگرتنی هێرشەکانی بۆ سەر ئۆکراینا قورستر دەبێت.